En Svizra han l’onn passà marcantamain dapli giuvenils empruvà da far suicidi. La clinica universitara per psichiatria d’uffants e giuvenils a Berna haja tgirà passa 50% dapli giuvenils suicidals sin la staziun d’urgenza il 2021, cumpareglià cun l’onn avant. Quai rapporta la «Sonntagszeitung».
Er la clinica universitara per psichiatria a Turitg discurra en quest connex d’ina situaziun d’urgenza che na saja anc betg surventschida. Ella haja dumbrà bunamain 280 emprovas da suicidi. Uss vegn pretendì in register naziunal per tschiffar meglier quests cas.
