En Svizra hai dà 1,49 milliuns ospitalisaziuns il 2022. Quai saja levet dapli ch’anc avant la pandemia da corona, communitgescha l’Uffizi federal da statistica.
Ils custs da gestiun da tut ils ospitals svizzers han muntà il 2022 a bunamain 34 milliardas francs. Quai è ina milliarda francs dapli, cumpareglià cun l’onn avant. L'augment da custs e consultaziuns na pertutga dentant tut las spartas medemamain.
Dapi il 2017 è il dumber da consultaziuns ambulantas en l'ospital vi da crescher. Er dal 2021 sin il 2022 è il dumber anc ina giada creschì, sch'ins na quinta betg las consultaziuns en connex cun corona - cun las consultaziuns en connex cun corona saja il dumber restà constant tar passa 24 milliuns. Er ils custs da purschidas ambulantas è creschì, e muntan a 8,7 milliardas francs. Quai è in plus da 5,3%. Il dumber da consultaziuns è creschì per 2,6%.
En general datti dapli ospitalisaziun pervia da tumors, malsognas d'autoimmunitad da la glonda gronda («Schilddrüse») e malsognas da Parkinson. Il dumber d'ospitalisaziuns da glieud giuvna pervia da motivs psichics n'è betg pli creschì uschè fitg sco il 2021.
Il pli grond augment da custs vegn da las staziuns urgentas (35,3%) e per 20,9% èn els creschì tar la medischina dals egls. Er en la medischina d'ureglias, nas e culiez (otorinolaringologia), la medischina d'uffants e tar la ginecologia e l'agid da parturir èn els creschids. Medemamain creschids en ils custs da manaschi dals ospitals. 38% dals ospitals han in deficit da passa ina milliun francs, quai èn cumpareglià cun il 2021 2% dapli, dentant anc adina pli pauc ch'en il 2020 (44%).
