451 milliuns francs ha la Confederaziun pajà ils davos 20 onns per la tgira d'uffants cumplementara a la famiglia. Quai ha communitgà l'Uffizi federal d'assicuranzas socialas. Passa la mesadad da quels daners èn vegnids duvrads per canortas d’uffants pitschens. In’autra cumpart è ida a la tgira cumplementara da la scola ed a famiglias dal di. En tut èn vegnidas stgaffidas passa 72'000 novas plazzas.
Il program è entrà en vigur il 2003, oriundamain per otg onns. Trais giadas è quel lura vegnì prolungà per mintgamai quatter onns e va a fin la fin dal 2024. La cumissiun responsabla dal Cussegl naziunal vul perquai remplazzar quest program cun ina lescha ordinaria per fixar quai permanent. Il Cussegl federal na vul betg uschè ina lescha perquai ch'ils custs sajan memia auts. En la sessiun da primavaira vegn il Cussegl naziunal a discutar sur da questa proposta.
