Auter ch'il Cussegl federal vul la cumissiun dentant che las expensas fatgas en l'exteriur vegnian cumpensadas cumplainamain en Svizra. Uschia stuessan las interpresas estras cumpensar tut las lavurs ch'ellas survegnan cun surdar en Svizra incumbensas en la medema valita.
Cussegl federal vul 60%
La cumissiun vul – sco oriund er il Cussegl federal – che la valita vegnia cumpensada en Svizra e quai cumplettamain. Firmas da l'exteriur che survegnan incumbensas en connex cun ils aviuns da cumbat, duain vegnir obligads da cumpensar 100% da la valita entras dar incumbensas a la Svizra.
Il Cussegl federal aveva dentant midà ses avis suenter la consultaziun. Tenor el duai 60% da la valita vegnir cumpensada. Tenor el fiss quai grev da realisar ils ultims 40% senza stgatschar il commerzi normal. Tenor la cumissiun stettia l'economia dentant be davos la fatschenta, sch'i dettia 100%.
Betg midà custs
La cumissiun n'ha midà nagut vid la rama finanziala da 6 milliardas francs dal pachet. I saja bain vegnì discutà, ma propostas correspundentas sajan vegnidas retratgas. Ord vista da la cumissiun saja absolutamain necessari da remplazzar ils aviuns da cumbat vegls. Auter na possia l'incumbensa da la Constituziun per la segirezza dal pajais betg vegnir garantida.
Ord l'archiv:
Il matg aveva il Cussegl federal decidì che la populaziun duai pudair votar davart ils aviuns da cumbat. Dentant be davart la dumonda generala, sch'i duai dar novs aviuns per maximal 6 milliardas francs u betg.
RR novitads 06:00
