La Svizra ha annunzià l’onn passà tar l’Uffizi da patenta europeic (EPA) tantas patentas sco anc mai. Cun passa 9’400 dumondas è ella sin l’entir mund sin il setavel plaz. Sch’ins resguarda il dumber d’abitantas ed abitants èsi schizunt l’emprim plaz. La Svizra ha annunzià 2,7% dapli patentas cumpareglià cun l’onn avant. Quai saja in augment «extraordinari» sco quai che l'Uffizi da patenta europeic ha communitgà.
Firmas en divers secturs dumondas patents
Cun 1'085 annunzias per milliun abitant ha la Svizra registrà las pli bleras annunzias per abitant sin l'entir mund. Quai ch'è passa il dubel da la Svezia ch'è en questa rangaziun sin plaz 2. Las annunzias vegnian ord differents secturs:
- tecnica medicinala (1010 patentas)
- bains da consum (1000 patentas)
- tecnica da mesirar (800 patentas)
Da nov registrescha l’Uffizi da patenta europeic er la cumpart da dunnas che annunzia patentas. En 29% dals cas saja almain ina inventadra annunziada. Quai ch'è bain dapli che la media europeica, dentant pli pauc ch'èn Spagna (43%), Frantscha (33%) e la Belgia (32%). Plinavant mussa l'evaluaziun da las cifras che las annunzias derivan cunzunt ord tschintg chantuns, numnadamain: Turitg (1307), Vad (1193), Basilea Citad (1033), Zug (996) e Genevra (921).
Las pli bleras patentas en Svizra, ha annunzià il concern da farma Hofmann – La Roche, cun en tut 754 annunzias. Sin l'entir mund è il concern da tecnologia da la China Huawei quel ch'è sisum la glista cun las pli bleras patentas annunziadas – en tut 5071.
Or da l'archiv
In lieu per innovaziun e tgisa forsa er inqual patenta en Grischun nascha actualmain a Cuira. L'InnoQube sin il Rossboden porscha lieu per firmas e start-ups ed en tut 300 plazzas da lavur.
