La Confederaziun sustegna 24 start-ups cun totalmain 58 milliuns francs. Quai ha communitgà il Secretariat da stadi per furmaziun, retschertga ed innovaziun. Uschia cumpensescha la Confederaziun ils raps che mancan al cussegl d'innovaziun da l'UE en il program «Horizon Europe». Ils projects dals start-up svizzers èn il 2021 vegnids classifitgads degns per sustegnair. Perquai che la Svizra na fa dentant mumentan betg part dal program da perscrutaziun da l'UE vegnan ils start-ups uss sustegnids sin via directa.
Questa finanziaziun directa duai rinforzar il lieu d'innovaziun e gidar da chattar soluziuns innovativas per sfidas da la societad. Ils start-ups sa fatschentan cun fotovoltaica sin terren agricul, cun softwares per vehichels autonoms, cun stimulaziun optica e magnetica per la guariziun da plajas cronicas e cun diagnosa a temp da parasits sin graun. Ils projects han per gronda part cumenzà l'entschatta 2022.
