Ils novs dazis per la Svizra: Il president american Donald Trump ha annunzià per decret novs dazis da chasti, suenter ch'il termin per pajais senza cunvegnas commerzialas cun ils Stadis Unids è scadì. La Chasa Alva ha publitgà ina glista da dazis da tut ils pajais. Tranter auter tutgan il Canada cun 35% e la Svizra cun 39% tar ils pajais cun ils dazis ils pli auts. Suenter la Brasilia (50%), la Siria (41%), Laos e Myanmar (mintgamai 40%) ha la Svizra survegnì il tschintgavel pli aut dazi da tut il mund. En l'Europa è quai la tariffa la pli auta. Ils dazis da 39% per la Svizra èn cleramain dapli ch'ils 10% che valevan dapi l'avrigl – e dapli ch'ils 31% ch'ins ha considerà en Svizra sco «worst case». Il Cussegl federal deplorescha quai fitg, vul dentant vinavant empruvar da chattar ina soluziun cun ils Stadis Unids. Ils novs dazis da 39% per la Svizra van en vigur a partir dals 7 d'avust.
Las raschuns per ils auts dazis: Il president american vul reducir il deficit commerzial dals Stadis Unids. I duai vegnir producì dapli en ils Stadis Unids. Plinavant vul el cuntanscher avantatgs en auters champs politics. Trump ha argumentà ses pass cun in dischequiliber commerzial. Plinavant n'hajan tscherts pajais betg gì avunda arguments u betg sa mess da la vart dals Stadis Unids en dumondas economicas e da segirezza.
Tge muntan ils dazis americans per il Grischun?
Il minister d’economia grischun Marcus Caduff è surstà dals dazis americans. I mussia ina giada dapli che quai n’haja nagin sistem. Per l’economia saja quai uss dentant in grev burdi da purtar, sch’i na dettia nagin’autra schliaziun.
Er intginas interpresas en il Grischun exporteschan products en ils Stadis Unids. Tenor Marcus Caduff vegnan quellas probabel ad ir en auters pajais da l’Europa a producir, nua ch’ils dazis èn pli bass. Quai che muntia per il Grischun ch’ins vegnia a perder plazzas da lavur.
L'interpresa Hamilton per exempel aveva gia l'avrigl annunzià da transferir 200 plazzas en ils Stadis Unids. Quai suenter ch'ils Stadis Unids avevan annunzià dazis da 31%. L'introducziun da quels aveva Donald Trump silsuenter dentant spustà, per pudair negoziar davart l'autezza da quels.
Karin Keller-Sutter: «Star si e far vinavant»
La presidenta da la Confederaziun Karin Keller-Sutter è s'exprimida davart la decisiun dals dazis americans a l'ur da las festivitads dal 1. d'avust sin il Rütli. Il Cussegl federal saja trumpà, uschia Keller-Sutter. Ins haja negozià ina cunvegna ch'il Cussegl federal aveva approvà l'entschatta fanadur. La cunvegna saja er vegnida approvada dals commembers e da las commembras dal cabinet da la regenza da Donald Trump. Apparentamain n'hajan els dentant betg survegnì il support dal president. Dar si na vul Karin Keller-Sutter dentant betg. La Svizra saja gia vegnida tras blers stemprads. Uss haja num «star si e far vinavant».
Il dazi ch'ins aveva negozià en la cunvegna saja stà bler pli bass, ina cifra exacta na numna Keller-Sutter dentant betg. «Igl è surprendent ch'ins n'ha betg resguardà la decleraziun d'intenziun.»
La Svizra emprovia vinavant da chattar in cumpromiss cun ils Stadis Unids, hai num da vart dal Departament federal d’affars exteriurs. Ina sfida sajan ils novs dazis cunzunt per las firmas ch’exporteschian bler, e per lur furniturs – pia l’industria d’uras, ils producents da maschinas e d’instruments da precisiun sco er l’industria da mangiativas. Per mantegnair plazzas da lavur fetschia la Svizra vinavant diever da l’indemnisaziun per lavur reducida, hai num da vart dal Departament federal da finanzas.
Fin a la fin sperava il Cussegl federal ch'i dettia ina soluziun per tractativas cun ils Stadis Unids. Tenor rapports en il Tages-Anzeiger ed en la NZZ ha la regenza americana gia acceptà il cumenzament da fanadur ina cunvegna da princip en la dispita da dazis tranter la Svizra ed ils Stadis Unids. I mancava dentant il consentiment dal post suprem a Washington. Avant aveva la presidenta da la Confederaziun Karin Keller-Sutter scrit sin X, ch'i n'hajan chattà nagina cunvegna davart la decleraziun d'intenziun negoziada tranter la Svizra ed ils Stadis Unids. Avant ch'il termin scadia haja ella gì in ultim discurs cun Trump. Per el haja il deficit commerzial prioritad.
Economiesuisse vesa interpresas d'export en privel
Ord vista da l'uniun tetgala d'economia «Economiesuisse» èn ils dazis americans da 39% ina smanatscha fitg seriusa per interpresas svizras d'export. Il Cussegl federal saja dumandà da prender svelt en mira da reducir ils dazis. La regenza stoppia chattar ina soluziun en la dispita da dazis cun ils Stadis Unids, pretenda l'uniun tetgala. I dovria ultra da quai mesiras sistematicas per distgargiar las interpresas. 39% dazis na sajan betg giustifitgads. La Svizra n'impedeschia ni cun dazis ni cun autras barrieras l'import da products americans. Ella saja il sisavel impurtant investider ester en ils Stadis Unids. Firmas svizras hajan stgaffì là radund 400'000 plazzas da lavur. Sumegliant è er la branscha d’uras s’exprimida.
Swissmechanic pretenda in agir decisiv da la regenza: Swissmechanic ha appellà a la regenza d'agir decisivamain cunter quests dazis. L'associaziun avertescha da las consequenzas a lunga vista per las interpresas pitschnas e mesaunas da l'industria svizra. La decisiun dals Stadis Unids saja privlusa per l'industria svizra sco er per la collavuraziun a lunga vista cun ils Stadis Unids. La Svizra possia segirar ses lieu industrial mo cun ina colliaziun mundiala e cun cundiziuns da basa fidaivlas.
Swissmem: «Pliras dieschmillis plazzas periclitadas en Svizra»: L'associaziun da l'industria da tecnologia svizra (Swissmem) vesa la naziun d'export svizra enormamain sut squitsch suenter l'annunzia da dazis da la regenza americana. Ils «dazis d'import massivs» da 39% tangheschan a moda extrema l'industria da tecnologia ch'è orientada fermamain a l'export. Quai pericliteschia pliras dieschmilli plazzas en Svizra, ha communitgà Swissmem. La Svizra gudognia mintga segund franc en il commerzi cun l'exteriur. La bainstanza da tuts saja periclitada.