Che la democrazia è sut squitsch inquietescha tuts trais politichers grischuns che nus avain dumandà. Dentant n'èn betg tuts dal medem avis sch'i va per la dumonda co che la rolla svizra duai guardar ora oz ed en l'avegnir.
Per il politicher da la partida dal Center, Martin Candinas, èsi impurtant che la Svizra resta vinavant impurtanta per las organisaziuns internaziunalas. Genevra stoppia restar relevanta. Auters pajais che vulan surpigliar la rolla da la diplomazia, sco per exempel il Qatar, na vesa el betg sco opziun a lunga vista. Tenor el vegn la Svizra era reconuschida co intermediatura gist era perquai che nus essan in pajais da bleras linguas e culturas e perquai che nus avain ina democrazia. Tenor el stoppian ins dentant sa posiziunar pli activ e pli fitg en quella rolla.
La Svizra sto giugar ina rolla pli activa.
Candinas menziunescha che la Svizra, sco ina pitschna naziun cun ina gronda tradiziun da democrazia, po giugar ina rolla impurtanta en las stentas globalas per la pasch.
La discussiun enturn la neutralitad
Roman Hug da la partida populara svizra vul ina stricta neutralitad e vesa quella sco futur e schanza per la Svizra. El crititgescha la politica actuala da neutralitad da la Svizra.
Quai na po gea betg esser che las tractativas da pasch vegnan manadas oz ad Istanbul u en l'Arabia Saudita u nua che quai è er adina.
El pledescha per ina reorientaziun vers ina neutralitad absoluta, argumentand che quai rinforzass la posiziun da la Svizra sco intermediatura en tractativas da pasch internaziunalas. Hug è da l'avis che la Svizra ha pers in pau da sia credibilitad sco mediatura perquai che tenor el na saja la Svizra betg pli propi sa posiziunada strict neutrala. Qua n’è Jon Pult dentant betg da la medema opiniun.
Collavuraziun cun l'Europa
La Svizra sto defender dretg internaziunal ensemen cun auters stadis democratics, di il politicher socialdemocrat, Jon Pult. El pledescha per ina collavuraziun pli stretga da la Svizra cun autras democrazias europeicas. El vesa quai sco decisiv per defender valurs cuminaivlas e per reagir a sfidas globalas.
Igl è impurtant per defender la democrazia ed il dretg internaziunal che nus collavurain cun autras democrazias europeicas.
Pult avertescha che l'isolaziun na fiss betg en l'interess da la Svizra, perquai che las valurs europeicas e svizras pon vegnir defendidas mo tras collavuraziun. El accentuescha l'impurtanza da relaziuns solidas cun ils pajais vischins e cun autras democrazias en l'Europa e sin il mund.