Siglir tar il cuntegn

Header

cuntegn

Accessibilitad senza barrieras Perfuraziun obligatorica sin quints manca

Per persunas tschorvas e cun deblezza da vesida èn las perfuraziuns sin ils quints in grond agid en il mintgadi. Senza dovran ellas agid u almain bler dapli temp per pudair pajar il quint.

En la lescha svizra èsi scrit, che quints cun in code QR han d'avair ina perfuraziun tranter las indicaziuns dal quint e la part per pajar. Quai er per che persunas tschorvas u cun deblezzas da vesida rivan senza grond agid e sforz da far pajaments. Tuttina vegn la Federaziun svizra dals tschorvs e flaivels da vesida adina puspè infurmada sur da cas nua ch'ils quints n'avevan betg perfuraziuns. Per in tschorv u ina tschorva è uschè in quint sin palpiri simplamain in fegl sco mintg'oter e betg da differenziar.

audio
Quints da palpiri cun code QR senza perforaziun èn in problem per persunas tschorvas
ord Actualitad dals 16.05.2023. Maletg: Keystone
laschar ir. Durada: 2 minutas 21 Secundas.

Problems cun custs

Che betg tut las firmas sa tegnan vi da la lescha ha plirs motivs. Tenor il president da la federaziun d'interpresas pitschnas e mesaunas è in problem l'infrastructura. I na saja betg pussaivel che mintga firma pitschna cumpra in squitschader che sa squitschar quints cun perfuraziun. Ils custs sajan memia auts sche a la fin na sajan gnanc tschorvs u persunas cun deblezza da vesida en la clientella. Tenor la federaziun d'interpresas pitschnas e mesaunas saja quai pli scort sche las persunas pertutgadas s'annunzian tar l'emittent da quint ed ins chattia uschia ina soluziun.

La Federaziun svizra dals tschorvs e flaivels da vesida na sa cuntenta betg cun questa soluziun ed insista sin il fatg che la lescha prescriva ina perfuraziun sin ils quints da palpiri cun code QR.

RTR actualitad 11:00

Artitgels legids il pli savens