Suenter avair analisà la decisiun da la Dretgira superiura dal chantun Berna, haja Fedpol decis da far recurs tar il Tribunal federal, ha l'uffizi federal communitgà la sonda. Fedpol ha uschia confermà in rapport en las gasettas da CH Media.
La fin da matg ha Fedpol stuì tragutter in'ulteriura terrada en connex cun l'affera AutoDaPosta: La Dretgira superiura aveva lura decis da betg entrar en in recurs da Fedpol. Quel recurs sa drizzava cunter ina decisiun da renviada da la Dretgira d'economia da Berna pervi da grevs sbagls da procedura.
Concret gievi là per la nominaziun da dus manaders da procedura externs en l'affera AutoDaPosta l'onn 2018. La Dretgira d'economia aveva decis, ch'igl haja mancà la basa formala legala per quest pass. Fedpol vul uss – sco pretendì da la Dretgira superiura – recrutar da nov responsabels per la procedura ed uschia puspè entrar en la procedura penala administrativa.
Fedpol ha inoltrà la gievgia il recurs tar il Tribunal federal. Finamira da quel recurs èsi da survegnir ina decisiun da la pli auta dretgira che sclerescha la dumonda da la nominaziun da responsabels da procedura entras ina autoritad da la Confederaziun, en ina procedura penala administrativa.
Affera è finanzialmain reglada
L'affera d'AutoDaPosta ha cumenzà il 2017. L'Uffizi federal da traffic aveva quella giada en il rom da la revisiun regulara constatà – che AutoDaPosta aveva dapi il 2007 manipulà la contabilitad, ed uschia zuppentà gudogns en il traffic public regiunal ed obtegnì dapli subvenziuns. Il december dal 2018 ed il schaner dal 2019 ha AutoDaPosta lura pajà enavos 205,3 milliuns francs a Confederaziun, chantuns e vischnancas.
En il visier da la accusa da Fedpol stattan sis anteriurs commembers dal cader da La Posta ed AutoDaPosta. Fedpol renfatscha als inculpads d'avair engianà en lur funcziun l'Uffizi federal da traffic davart ils effectivs gudogns da l'interpresa, per uschia evitar ina reducziun da las subvenziuns.
