Violenza, smanatschas e delicts sexuals: L'onn passà han ils posts da cussegliaziun per l'agid per victimas fatg 4% dapli consultaziuns ch’anc l'onn avant, numnadamain 46’542. Vinavant mussan las cifras da l'Uffizi federal da statistica in marcant augment tar las indemnisaziuns per victimas e confamigliars. Cumpareglià cun l'onn avant munta l'augment a 20%.
Tut en tut han ils posts spezialisads per l’agid a victimas pajà 5,8 milliuns francs indemnisaziuns. In zic dapli che 30’000 francs èn ids dabun en il Grischun.
Vinavant mussan las cifras svizras:
- En trais quarts dals cas han dunnas u lur confamigliars laschà cussegliar dal post per agid d'unfrendas.
- Medemamain trais quarts da las unfrendas han inditgà d'enconuscher la persuna supponida culpanta. Savens stattan unfrenda e persuna culpanta en ina relaziun persunala.
- En passa la mesadad dals cas sa tractia dal partenari u ex-partenari ubain d'autras persunas or dal ravugl da la famiglia.
