Siglir tar il cuntegn

Header

cuntegn

Agricultura Dispitaivel tge mesiras che duain manar ad aua netta

Cun la finamira da reducir il diever da pesticids en l’agricultura van tuts perina. La dretga via è dentant dispitaivla, quai mussa la consultaziun da l’emprim pachet da l’ordinaziun per reducir il ristg tar il diever da pesticids en l’agricultura.

Praticamain nagin sa metta da principi cunter il «Plan da mesiras per aua schubra». Ma davart la via co cuntanscher questa finamira, van las opiniuns dapart. Era tar las uniuns purilas sezzas.

Ils ins vulan damain, auters dapli

L’Uniun purila svizra va d’accord cun las ideas generalas, n’è dentant betg cuntenta cun ils detagls. Uschia di quella, che las finamiras per reducir ils pesticids sajan extrem ambiziusas. Ed ella è per reducir per 10% la concentraziun da nitrogen e fosfor en il terren agricul enfin il 2030. Il Cussegl federal propona 20%. Ed ils auters secturs che dovrian pesticids stoppian era s’engaschar.

Memia pauc consequentas èn las mesiras proponidas dal Cussegl federal, per l’Uniun svizra dals purs pitschens e mesauns VKMB. La politica dals pass pitschens portia anc dapli lavur administrativa a las puras ed als purs. Meglier fiss tenor els da sustegnair pli fitg sistems cumplessivs sco bio e producziun integrada – e d’introducir taxas directivas sin pesticids.

Finamira da metter en vigur il 2023

Tenor il Cussegl federal dat il plan da mesiras respostas concretas sin la problematica dals pesticids. Quai cuntrari a las duas iniziativas agraras – ch’il suveran svizzer ha refusà il zercladur passà a l’urna.

Las midadas proponidas areguard il diever da pesticids en l’agricultura vegn il Cussegl federal probablamain a decider la primavaira 2022. Pli tard duai suandar in segund pachet cun ulteriuras mesiras.

audio
Per tadlar curt e cumpact
01:08 min, RTR Audio dals 20.08.2021.
laschar ir. Durada: 01:08 minutas.

RTR novitads 12:00

Artitgels legids il pli savens

Scrollar a sanestra Scrollar a dretga