Gist pollen da badugns è extraordinari pitschen, ed entra cun quai profund en la via respiratorica. Levgiament n'è strusch en mira: La stagiun da las ervas flurentas ha gia cumenzà. Pia perspectivas malas per persunas che pateschan da «strucca da fain» – pertge che trais quarts da tut paziaints d’allergias pateschan surtut da pollen dad ervas.
Il 2026: in onn spezial
La chargia da pollen saja actualmain propi fitg auta, di Karin Hartmann, schefmedia remplazzanta dermatologia e manadra da la policlinica allergiologica da l'Universitad Basilea. Quai haja da far cun l'aura sitga e chauda. E pervia da la midada dal clima ed ils envierns pli chauds, sgolia il pollen durant ina perioda adina pli lunga. Igl vegnia pli chaud, tras qua as prolungheschian la stagiun da pollen. Quai sentan er medis e clinicas spezialisadas. Actualmain vegn rapportà da fitg bleras dumondas per examinaziuns pervia da la strucca da fain.
Quai èn ils sintoms
Tar ina allergia da pollen («strucca da fain») reagescha il sistem d'immunitad sin ils proteins dal pollen da plantas che sgolan enturn, ch'èn ansasez nunprivlus. E perquai che differentas plantas cun different pollen han differents proteins na reagescha betg mintga paztgaint medem ferm sin il medem pollen. Sintoms pussaivels d'ina reacziun allergica èn: attatgas da starnidar, in nas current u stuppà, egls irritads, briclar en la gula, il nas u en las ureglias. Sin tgenin pollen exact ch'in reageschi allergic, po igl medi chattar or cun tests. Quai pussibilitescha in tractament specific.
Quai pon ins far
Per vegnir en contact uschè pauc sco pussaivel, duessan allergichers ed allergicras actualmain passentar uschè pauc temp sco pussaivel ordadora. Er vegn recumandà da purtar egliers da sulegl e tar ina ferma allergia ina mascra. Avant co ir a durmir gida da far la duscha per lavar or il pollen ord ils chavels. La notg na duessan ins dess betg deponer vestgadira ch'ins ha purtà durant il di en chombra da durmir, e laschar serrà la fanestra. Plinavant cusseglia Dr. Karin Hartmann da prender daguts per ils egls, sprays per il nas ni da prender antihistaminika sche necessari. En quel sectur dettia medicaments ch'ins survegn senza recept en l'apoteca, nua ch'ins po er as laschar cussegliar dad ina persuna dal fatg. Tar ina ferma reacziun as dess consultar in medi.
Infurmaziuns tar la situaziun da pollen
La situaziun actuala da la concentraziun da pollens as po proseguir sin differentas paginas web – tar SRFmeteo ubain anc pli detaglià tar il center d’allergias svizzer (Allergiezentrum Schweiz). Persunas dal fatg recumondan d’adattar il cumportament persunal, sche extraordinari bler pollen sgola. Uschia as po eventualmain planisar meglier cura ch'in passa temp ordadora ubain reducir quest temp. Er pon ins dar ventilar l'abitaziun uschia, ch'in ventilescha pli pauc durant fasas dad auta concentraziun da pollen ed eventualmain spetgar giu aura da plievgia. Sch'igl plova vegn numnadamain il pollen lavà or da l'aria.