Igl è stà in'elecziun da cumbat l'emna passada a Turitg per il presidi da l'AdC dal chantun da Turitg. Dus duos han candidà in pli vegl ed in pli giuven. Il giuven cun Tina Deplazes e Michelle Halbheer ha fatg la cursa. E perfin il president da l’Allianza dal Center Svizra, Gerhard Pfister è vegnì a Turitg per gratular a las duas novas presidentas chantunalas.
Jau hai il numer da natel da Gerhard Pfister e sche jau dovr ses sustegn, poss jau contactar el e survegn fitg svelt ina resposta.
Tina Deplazes ha cumenzà sia carriera politica cura ch’ella aveva 20 onns cun entrar en la partida e cun daventar bainspert commembra da la suprastanza da la partida giuvna. Cuntinuà ha sia lavur politica en il parlament communal da Wetzikon. Dapi quatter mais è ella uss er ruschnada suenter en il parlament dal chantun da Turitg. Aschia ch'ella cumpara er magari en las medias ed è uschia er daventada in zic enconuschenta – e quai fetschia er grond plaschair a la parantella rumantscha.
Els han tuts grond plaschair, els scrivan er mintgant sch'els han vis a mai en televisiun ed er en l'ustria Surrein raquinta il bab ch'i vegnia discurrì da Tina e Luis che fan politica a Turitg.
Ch’ella e ses frar Luis, ch'è dal reminent er activ politicamain tar la Partida liberaldemocratica, discurran uschè bain rumantsch, malgrà ch’els n’han mai frequentà ina scola rumantscha, è d’engraziar a lur geniturs ch’han cultivà la lingua paterna consequentamain, malgrà che la mamma è d’origin catalan.
