En emprima lingia è il Na a l’iniziativa SRG SSR in Gea al service public e quai en tut las quatter linguas naziunalas. La populaziun ha stuì far il quint: sche quels 100 francs l’onn ch’ins avess pudì spargnar cun l’iniziativa valessan la paina da desister sin ina part dal program da radio e televisiun. Ed il suveran è vegnì a la conclusiun che mantegnair in ferm service public vala ils raps pajads: I dovra er vinavant infurmaziuns equilibradas da mintga regiun da la Svizra.
Medias e democrazia
Sch’ins ha persequità las debattas enturn l’iniziativa è l’impurtanza d’ina ferma plazza da medias per democrazias adina vegnida accentuada. I dat studis che mussan che chasas da medias da dretg public independentas e crediblas sco la SRG SSR èn impurtantas per fermas democrazias.
Ins po observar sin l’entir mund – er en Europa – che las medias ed en spezial las chasas da medias da dretg public èn sut squitsch. Questas tendenzas han segir gì influenza er sin la votaziun dad oz – sch’ins observescha tge che capita en auters pajais sche las medias vegnan indeblidas è quai savens er in problem per la democrazia. Las chasas da medias da dretg public sco la SRG SSR, che han l’obligaziun d’offrir infurmaziuns equilibradas, protegian numnadamain er cunter fake news, emprovas da manipulaziun e propaganda.
Fabia Caduff
Correspundenta Chasa federala