Tut ils chantuns han decis da trametter da la glatscha giu l'iniziativa che vuleva reducir la taxa da medias sin 200 francs. Uschia èsi stà cler relativ spert che l'iniziativa na cuntanschia betg la maioritad dals chantuns. Però er puncto maioritad da las vuschs è il resultat cler.
Iniziativa SRG SSR
Svizra: Iniziativa dal pievel «200 francs bastan!»
-
GEA
1'188'289 Vuschs
-
NA
1'934'369 Vuschs
Vuschs dals chantuns
- GEA
- Na
Cun quella decisiun va la cuntraproposta indirecta en vigur. Quella prevesa da sbassar la taxa da medias sin 300 francs fin il 2029 – actualmain èn quai 335 francs per onn e chasada. Plinavant duain interpresas cun ina svieuta da pli pauc che 1,2 milliuns francs vegnir deliberadas da la taxa - actualmain è quest cunfin tar 500'000 francs.
Cun questa reducziun vegn la SRG SSR, nua ch'er RTR fa part, a stuair spargnar var 270 milliuns francs fin il 2029.
Levgiament tar adversaris, PPS tema per fatschentas
Per Martin Candinas, ch'ha fatg part a la campagna cunter l'iniziativa, mussia il resultat che la glieud veglia la SRG SSR ed in program multifar. Il cusseglier naziunal dal Grischun spera uss ch'ins laschia uss er en paus quest tema. La SRG survegnia cun la cuntraproposta indirecta ina cler'incumbensa da spargnar.
Jan Koch, in dals ferms sustegniders da l'iniziativa, n'è betg surstà dal resultat. La campagna cunter l'iniziativa saja stada gronda e diversa, ins haja «chavà or» numerus sportists ed artistas per cumbatter l'iniziativa. Tuttina haja el percurschì sustegn per l'iniziativa – surtut quai che pertutga las taxas per interpresas. Tar quest punct vegnian ins a s'engaschar vinavant. Ins haja dentant cun l'iniziativa cuntanschì che la taxa vegn sbassada e ch'i ha dà ina discussiun davart la rolla da la SRG SSR.
Signal per medias en las regiuns
Grond levgiament resenta er il directur da RTR, Nicolas Pernet. Il resultat saja in signal cler per che la SRG SSR resta en las regiuns cun in program multifar. Il resultat da 63% dal Grischun saja er in segn ch'il Grischun vul in RTR ferm, betg be per la Rumantschia, mabain per tut il chantun. Tge ch'il program da spargnar – 270 milliuns francs fin il 2029 – munta per RTR vegnia dentant anc elavurà ils proxims mais.
Er la Lia Rumantscha beneventa il cler resultat. Ella sa legra da la ferma decisiun da la populaziun per il servetsch public. La decisiun saja impurtanta per la coesiun svizra e per la plurilinguitad.
Grischun refusa iniziativa cun 63,7%
Il resultat grischun è cler: Il Grischun refusa l'iniziativa SRG SSR cun 63,65% cleramain. Be in pèr vischnancas acceptan l'iniziativa. Quellas sa chattan surtut en il Partenz, en la regiun Moesa sco er Samignun. En bunamain tuttas regiuns hai dentant dà ferm cuntravent. La vischnanca da Medel ha refusà il pli cler cun 78,7% l'iniziativa. La participaziun a la votaziun munta a 54,7%.
Iniziativa SRG SSR, resultat Grischun
Resultat