- La SRG sto spargnar entaifer il program da spargn «Enavant» fin il 2029 radund 270 milliuns francs.
- Per cuntanscher quai prevesa l’interpresa sper ina transfurmaziun fundamentala da reducir fin il 2029 probablamain 900 plazzas a temp cumplain, sco ch’ella communitgescha.
- La SRG SSR aveva annunzià la transfurmaziun gia il zercladur ed ha ussa concretisà ses plans.
In terz, pia radund 300 plazzas, vegn realisà entaifer il program da spargn actual. Quest process saja gia consultà ed en cursa, scriva la SRG. Ina part da las ulteriuras 600 plazzas vegn reducida tras fluctuaziun e pensiunaments. Resalvà ils resultats dal process da consultaziun. Relaschadas sajan dentant inevitablas. Per la reducziun da plazzas vala il plan social da la SRG.
La raschun per questas mesiras drasticas è tranter auter la reducziun da la taxa da medias decidida dal Cussegl federal, da la quala l’emprima etappa entra en vigur il schaner 2027. Fin là sto la SRG spargnar 125 milliuns francs. Parallelamain è il mund da medias en midadas: Las persunas consumeschan cuntegns adina pli digital, e la cuntrada mediala en Svizra sco er a nivel internaziunal sa mida spert.
Reducziun da la direcziun generala
Er en la direcziun vegn reducì il persunal. A partir d’avrigl 2026 cumpiglia la direcziun generala, sper la directura generala Susanne Wille, mo pli set enstagl otg commembers. La partiziun Swissinfo, che sa drizza cun sia plattafurma surtut a Svizzers a l’exteriur ed a persunas da l'exteriur che s'interesseschan per la Svizra, na fa betg pli part da la direcziun generala, tenor il nov organigram.
Ils posts da las directuras e dals directurs da SRF, RTS, RSI e RTR restan confermadas. Era la direcziun extendida cun trais commembers supplementars resta sco fin qua.
En il rom da la reducziun restructurescha la SRG duas partiziuns da la direcziun: La nova direcziun «Purschida» unescha ils secturs fin ussa separads purschida e distribuziun. La direcziun «Operaziuns» cumpiglia da nov tecnologia e producziun.
Nova planisaziun en las regiuns
Las plazzas vacantas da las duas novas direcziuns vegnan – sper quella da la direcziun SRF – scrittas ora da nov. La direcziun da SRF sto vegnir occupada da nov, perquai che Nathalie Wappler ha annunzià sia demissiun fin la fin d’avrigl.
Las funcziuns da la directura da Swissinfo e dal directur da «Operaziuns» restan fin la fin mars 2026. Ils titulars da questas plazzas accumpognan il process da transiziun da la structura veglia a la nova, ha la SRG ditg sin dumonda da l'agentura da novitads Keystone-SDA.
Era las structuras da direcziun en las regiuns sa midan. Quellas vegnan unifitgadas per promover la collavuraziun tranter las regiuns. La nominaziun dals teams da direcziun regiunal duai succeder fin la mesadad dal 2026.
Quant che questas mesiras influenzeschan finanzialmain, n’ha la SRG betg commentà. Quai dependia da differents facturs che sa precisan pir en il decurs da l’execuziun.