Tut ils chantuns han ditg da na, uschia ch'igl è stà cler relativ spert che l'iniziativa na cuntanscha betg la maioritad dals chantuns. Però era tar la populaziun è l'iniziativa ida da la glatscha giu cun 70,7% na. L'iniziativa per in fond per il clima aveva pretendì meds da 4 fin 8 milliardas francs ad onn per cumbatter la midada dal clima – quai che correspunda a 0,5 fin 1% da la prestaziun economica.
Actualmain pretenda la lescha davart il clima e l'innovaziun che la Svizra reducescha sias emissiuns da gas cun effect da serra fin l'onn 2050 a netto nulla, e contribuescha sia part a la Cunvegna da Paris davart il clima. Per quest intent metta la Confederaziun a disposiziun var 2 milliardas francs per onn, per exempel per implants solars u per remplazzar stgaudaments d'ieli tras pumpas da chalur.
Iniziativa per in fond per il clima
Svizra: Iniziativa dal pievel «Per ina politica energetica e climatica gista: investir per la prosperitad, la lavur e l'ambient»
-
GEA
897'216 Vuschs
-
NA
2'165'495 Vuschs
Vuschs dals chantuns
- GEA
- Na
Era Grischun refusa cleramain
Tut las 100 vischnancas en il Grischun han gia dumbrà las vuschs. Il Grischun di cleramain Na al fond per il clima – quai cun 76,8% Na e 23,2% Gea. Tut las vischnancas han refusà l'iniziativa. La participaziun a l'urna munta a passa 54,6%.
Iniziativa per in fond per il clima, resultat Grischun
Resultat
Debatta dal clima anc betg terminada
Ord vista da la PS e dals Verds han ins manchentà cun il Na ina schanza da prender a mauns la crisa dal clima a moda socialmain cumpatibla e cun investiziuns sistematicas, sco ch’els scrivan en ina communicaziun.
Ussa ston las partidas dretgas surpigliar lur responsabladad e mussar a nus co ch’els vulan cuntanscher questas finamiras, empè da sa metter permanentamain encunter las dumondas dal clima.
Quai ha ditg la presidenta dals Verds e cuninizianta Lisa Mazzone a l’agentura da novitads Keystone-SDA. La finamira da netto nulla saja decidida, vi da questa na sa midia nagut.
Tuttas duas partidas averteschan da betg sutvalitar ils custs dal commerzi. Tgi che investescha oz memia pauc, engrevgeschia tant pli fitg las generaziuns futuras. Per ils Verds e la PS na saja la debatta dal clima anc betg terminada. Els veglian far squitsch sin il parlament ed il Cussegl federal per che la Svizra sa tegnia vid lur obligaziuns. Propostas concretas sajan gia sin maisa, per exempel l’iniziativa solara ch’è vegnida inoltrada il november passà, ha ditg Mazzone.
Era il president da la Partida verd-liberala Jürg Grossen ha er prendì posiziun sin l’iniziativa: «Il pievel ha ditg Na a l’instrument proponì per il fond per il clima. Nus Verdliberas n’eran betg in adversari per la protecziun dal clima, mabain eran nus da l’opiniun che l’instrument da finanziaziun è stà il fallà.» Perquai na valitescha el il Na betg sco in Na cunter la protecziun dal clima, mabain cunter l’instrument.
Christian Wasserfallen da la PLD è da l’avis che la discussiun dals auters temas da votaziun è stada pli prominenta. Pertutgant il cuntegn di el ch'i sa tracta gia da la segunda iniziativa magari radicala en il sectur da la protecziun dal clima. Gia avant in onn hajan ils Giuvens Verds pers cleramain lur iniziativa a favur da l’ambient.
La populaziun ha forsa plaunet avunda da questa dramatisaziun.
Las mesiras da netto nulla stoppian la fin finala er esser economicas e cunzunt pajablas. «E questas pretensiuns n’eran simplamain betg pajablas.»
