Ina maioritad da 54,3% da las votantas e dals votants han approvà la lescha per l'imposiziun da taglia individuala. Cunquai ch'i sa tracta d'ina lescha e betg d'ina iniziativa cun midada da la Constituziun, n'è la maioritad dals chantuns betg necessaria. Quella n'avess il project era betg cuntanschì cun 13 chantuns ch'han vuschà da na.
L'imposiziun da taglia individuala
Svizra: Lescha federala davart l'imposiziun da taglia individuala
-
GEA
1'662'017 Vuschs
-
NA
1'401'166 Vuschs
Era il Grischun avess refusà la taglia individuala
L'imposiziun da la taglia individuala avess il Grischun refusà cun 52,2% Na e 47,8% Gea. La participaziun a l'urna è muntada a 54,6%.
Entant che vischnancas grischunas sco Furna u Ferrera han refusà cleramain la taglia individuala cun passa 70%, han vischnancas sco Segl u Madulain en Engiadin'Ota ditg cun radund 60% Gea.
L'imposiziun da la taglia individuala, resultat Grischun
Resultat
Per èsi ì?
Actualmain fan pèrs maridads ina decleranza da taglia communabla. Quai maina ad inegualitads cun pèrins betg maridads, nua ch'omadus partenaris fan in'atgna decleranza da taglia. Per midar quai duain tut las persunas en Svizra vegnir taxadas individualmain, independent dal stadi civil. Ord quest motiv ha il parlament deliberà la Lescha federala davart l'imposiziun da taglia individuala. La lescha è la cuntraproposta a l'iniziativa per ina taglia individuala da las dunnas da la Partida liberaldemocratica. Lezzas avevan retratg l'iniziativa suenter ch'il parlament aveva elavurà la lescha. Encunter la lescha hai dà in referendum – perquai datti ina votaziun dal pievel en chaussa.
«Mument decisiv per l’egualitad» – «Nov chasti per famiglias»
Gia suenter las emprimas calculaziuns approximativas che han inditgà in Gea a l’imposiziun da taglia individuala era la co-presidenta da la PLD Susanne Vincenz-Stauffacher fitg cuntenta: «Oz è in grondius di per scriver istorgia». Quai surtut perquai ch’i saja il di internaziunal da la dunna. «Nus avain adina gì buna speranza da pudair persvader il pievel.» Gist en la fasa finala saja gartegià da mobilisar aderentas.
La partida da Vincenz-Stauffacher ha scrit pli tard en ina communicaziun: Grazia a l’imposiziun da taglia individuala valia la lavur finalmain per tuttas e tuts. «La discriminaziun da pèrs maridads è istorgia.»
Per la cussegliera naziunala dals Verds da Son Gagl, Franziska Ryser, è in Gea a l’imposiziun da taglia individuala in «culp da liberaziun per egualitad». I muntia era in’investiziun en il martgà da lavur, perquai ch’i vegnia stgaffì novas plazzas, ha ella ditg envers SRF.
Era las partidas da la PS ed ils Verdliberals sa mussan fitg cuntent davart il resultat.
Las partidas da la PPS, la Giuvna partida evangelica da la Svizra e l'Uniun democratica federala, l’uniun purila e la IG Familie 3plus han oravant argumentà che la midada na fetschia betg pli gist il sistem. Famiglias, persunas che vivan sulettas e la classa mesauna vegnian engrevgiadas pli fitg, entant che persunas cun in gudogn dubel profiteschian.
La cussegliera naziunala da la PPS da Sursilvania Monika Rüegger ha pia era discurrì da gronds perdents:
I dat in nov chasti da famiglia
Perquai na saja la lavur politica betg a fin. I valia ussa da persequitar criticamain «che nus na realisain betg quest chasti da famiglia». Ella ha annunzià envers SRF intervenziuns da sia partida per che las famiglias e la classa mesauna na vegnian betg chastiadas.
L’Allianza dal Center na vul betg retrair sia iniziativa dal pievel cunter il chasti fiscal per pèrs maridads malgrà il Gea a l'iniziativa da la taglia individuala. Quella chaschunass main lavur a las autoritads, perquai ch’ella pertutgia mo il plaun federal e na chaschuna betg custs supplementars per ils chantuns, ha argumentà la scheffa da fracziun da l’Allianza dal Center Yvonne Bürgin envers SRF.
«Sfida per ils chantuns»
Er da numerus chantuns hai dà blera opposiziun en il cumbat da votaziun. Diesch dad els avevan schizunt cumbattì il project cun il referendum dal chantun. Il president da la Conferenza da las regenzas chantunalas Markus Dieth ha numnà la realisaziun da la Lescha federala davart l’imposiziun da taglia individuala sco «pretensius».
En in’emprima posiziun envers SRF ha il politicher da l’Allianza dal Center e cusseglier guvernativ da l’Argovia ditg che las tariffas e las deducziuns stoppian vegnir adattadas.