L'iniziativa originala per il daner blut vegn refusada. Quai è gia stà cler, avant che las vuschs eran dumbradas a fin, suenter che 14 chantuns han ditg na. Però era tar la populaziun n'ha l'iniziativa betg chattà avunda sustegn. L'iniziativa aveva pretendì ch'i vegnia fixà en la Constituziun l'obligaziun da daners bluts e ch'il franc restia la valuta svizra. Plinavant duai la Confederaziun da nov esser responsabla, betg la Banca naziunala. Quai na vegn betg ad esser il cas.
Iniziativa per il daner blut
Svizra: Iniziativa dal pievel «Gea ad ina valuta svizra libra ed independenta cun munaida u bancnotas»
-
GEA
1'380'852 Vuschs
-
NA
1'646'498 Vuschs
Vuschs dals chantuns
- GEA
- Na
La cuntraproposta directa ha percunter sustegn. Tut ils chantuns la han approvà e tar la populaziun ha'la chattà accoglientscha tar 73,4% da las votantas e dals votants. Er la cuntraproposta directa prevesa da fixar en la Constituziun l'obligaziun da daners bluts, dentant cun in auter text.
Cuntraproposta a l'iniziativa per il daner blut
Svizra: Conclus federal davart la valuta svizra ed il provediment cun daner contant
-
GEA
2'168'295 Vuschs
-
NA
786'049 Vuschs
Vuschs dals chantuns
- GEA
- Na
Er tar la dumonda da tagl – pia la dumonda directa, tge versiun che la populaziun preferiss – sa mussa in cler sustegn per la cuntraproposta cun 62,6%.
Naginas midadas en il mintgadi
Ni l'iniziativa dal pievel ni la cuntraproposta n'avessan consequenzas per il mintgadi tenor la Confederaziun. Il cusseglier naziunal da l'Argovia Beat Flach di ch'i na dettia betg bler da dir davart la votaziun. I valia vinavant quai che stat en las leschas – simplamain uss lura en la Constituziun.
Er da la vart dals iniziants vegn discurrì d'in success: i saja gartegià da pledentar in tema impurtant. L'iniziant Richard Koller ha er annunzià ch'ins veglia il proxim temp anc formular intginas moziuns per il parlament. Uschia vai per exempel per garantir ch'il daner blut na vegn betg be garantì, dentant er vinavant acceptà.
Grischun preferescha er la cuntraproposta
Il Grischun è sa decidì per la cuntraproposta. Passa 71% da las Grischunas e Grischuns han votà per la cuntraproposta. L'iniziativa originala è vegnida approvada da be 44% da la populaziun dal chantun. Il pli grond sustegn per l'iniziativa hai dà en la regiun Moesa e per part en il Partenz. Il rest dal chantun è plitost per la cuntraproposta. La participaziun a l'urna munta a passa 54%.
Iniziativa per il daner blut, resultat Grischun
Resultat
Cuntraproposta a l'iniziativa per il daner blut, resultat Grischun
Resultat
Dumonda da tagl, resultat Grischun
Resultat Gea = preferenza iniziativa, Na = preferenza cuntraproposta
