Il rument da plastic strapatscha la Terra er en sia pli pitschna furma. L'Organisaziun mundiala da la sanadad WHO ha evaluà studis davart microplastic en l'aua. Tenor il resultat èn anc bleras dumondas avertas. Per consequenza vegn l'organisaziun a la conclusiun, che la derasaziun da microplastic en l'aua da baiver e sias eventualas consequenzas per la sanadad stoppian vegnir examinadas pli exact.
Las infurmaziuns limitadas ch'els hajan a disposiziun enfin uss mussian, ch'il microplastic en la concentraziun actuala na saja betg in ristg da sanadad. Autras contaminaziuns da l'aua, per exempel entras substanzas chemicas sajan bler pli decisivas.
Per augmentar la savida davart il microplastic ed ses effects sin la sanadad, dovria dentant en mintga cas dapli perscrutaziun. Il medem mument stoppia il rument da plastic vegnir franà. Microplastic saja dapertut, uschia er en la circulaziun dad aua, scriva la WHO.
RR novitads 06:00
