L'Andermatt Swiss Alps ha fatg ina sperdita da 12 milliuns francs pervi dal coronavirus. Questa sperdita resultia da mez mars fin ils 30 d’avrigl, sco il pledader da la Andermatt Swiss Alps (ASA) Stefan Kern ha ditg a RTR.
Per 700 dals 900 collavuraturs avain nus annunzià lavur curta.
Betg stuì relaschar persunas
La ASA n'hajan dentant betg stuì relaschar persunal, surtut era perquai che blers collavuraturs lavuran mintgamai mo durant ina stagiun.
In pitschen radi da speranza saja ch’els possian bainbaud puspè avrir ils dus hotels The Chedi Andermatt e Radisson Blu. E forsa possian ins era bainbaud puspè dar golf.
In bun enviern fin ils 13 da mars
E per cletg saja la stagiun d’enviern stada buna enfin ch’els hajan serrà il manaschi ils 13 da mars, di Stefan Kern. Tar ils dis da skis (Skier Days) haja l’Arena da skis Andermatt-Sedrun gì in plus da 5% e tar la svieuta in plus da 6% – cumpareglià cun l’enviern avant che saja era gia stà bun. Plinavant hajan els vendì varga 25’000 abunaments da mez pretsch ed era pli blers abunaments da l’onn (+ 8%).
