L’anteriura cussegliera federala Ruth Dreifuss è trumpada dal svilup da la lescha davart l’assicuranza da malsauns. Dapi 30 onns vegnia gia zambregià vidlonder, ha ditg Dreifuss envers la gasetta «Le Matin Dimanche».
«Sco in aviun»
La lescha federala, ch’ella ha introducì sco ministra da l’intern il 1994, ha ella descrit en l’intervista metaforicamain sco aviun: I na dettia nagin pilot en il cockpit. U meglier: I dettia memia blers – e tuts stirian en differentas direcziuns. L’aviun na vegnia bain betg a crudar giu, dentant vegnian ils passagiers a bord scurlattads. Dapi la bell’entschatta saja stà cler che la lescha stoppia vegnir adattada. Ina revisiun n’haja dentant mai dà, uschia Dreifuss vinavant.
Nold: Premias pudessan crescher per fin 9% il 2024
Per cuvrir ils custs da sanadad che sajan creschids ston las premias da las cassas da malsauns vegnir augmentadas per 8 fin 9%. Quai ha la directura da Santésuisse, Verena Nold ditg en la Samstagsrundschau da Radio SRF. Particularmain chars sajan ils medicaments en Svizra. Nagliur en l'Europa custian quels tant sco tar nus. Las novas tariffas da las cassas da malsauns vegnan publitgadas en radund quatter emnas.
Or da l'archiv
