- La preda da l’attatga sin la firma d’informatica Xplain il matg 2023 munta a passa 9’000 objects da datas.
- La mesadad da las datas èn sensiblas, tenor l’Uffizi federal per la cybersegirezza.
- E 95% da las datas derivan da partiziuns dal Departament federal da giustia e polizia.
Ils passa 9’000 objects da datas han ils criminals silsuenter publitgà en il darknet. Ed ils 4’779 objects sensibels han cuntegnì datas da persunas, infurmaziuns tecnicas, infurmaziuns classifitgadas e pleds-clav. 121 objects eran classifitgads, e quatter objects cuntegnevan pleds-clav legibels.
Bunamain tut las datas derivian dal Departament federal da giustia e polizia, scriva l’Uffizi federal per la cybersegirezza. Tranter quellas l’Uffizi federal da polizia Fedpol e l’Uffizi federal da la duana e da la segirezza dals cunfins. Engulà las datas da plirs tschients gigabytes ha la gruppa da hackers «PLAY».
Investigaziuns fin la fin da mars
Il pachet da datas ch’ils criminals han silsuenter publitgà il zercladur en il darknet, aveva in volum da radund 1,3 milliuns objects. La quantitad da datas relevanta per l’administraziun federala cumpigliava circa 5% da l’entira massa publitgada. Il proceder dals hackers laschia supponer che quels hajan examinà pauc profund las datas, senza analisar il cuntegn – scriva l’Uffizi federal per la cybersegirezza.
Il rapport publitgà la gievgia n’ha dentant betg intercurì, daco che las datas han pudì mitschar. Questa dumonda vegnia sclerida en il rom da l’investigaziun administrativa che saja en lavur, e ch’il Cussegl federal aveva ordinà l’avust passà. Fin la fin da mars duai l’investigaziun, fatga d’ina advocatura, esser terminada.
Suenter l’attatga ransomware sin la firma Xplain ha plinavant l’incumbensà federal per la protecziun da datas e per la transparenza instradà in’inquisiziun. Ed en quest connex ha er il parlament a Berna reagì, cun inoltrar ina moziun al Cussegl federal. Quel duai procurar per novas basas legalas per conservar a moda segira las datas digitalas las pli impurtantas da la Svizra.
