Il pli savens derschan ils selviculturs plantas da guglias, numnadamain 69%. La gronda part da quella è la laina da resgia cun gest 2,5 milliuns meters cubic. Quai munta in augment da 6% e correspunda a bun 50% da l’entira racolta. Sulet 10% da la racolta daventa laina d’industria.
Dapli laina per producir energia
La cumpart da laina che vegn pinada per far energia è s’augmentada per 2% sin 2 milliuns meters cubic. Quai correspunda a 40% da la racolta. Avant 20 onns era quai anc 20%. Il segment daventa pia adina pli impurtant. Ils Svizzers stgaudan pli savens cun laina.
Damain deficit
Ils manaschis forestals avevan preschentà l’onn 2020 in deficit da 44 milliuns francs. L’onn 2021 han els gì expensas da 590 milliuns francs e gudagnà 583 milliuns francs. Pia è la sperdita mo 7 milliuns francs. Tenor persunas dal fatg sajan ils pretschs per laina creschids pervia da la gronda dumonda «sin in livel normal».
