Quai che pertutga il dumber da persunas che ston ir en ospitals, na pon ins tenor Virginie Masserey betg dir co la pandemia sa sviluppa, malgrà cifras che sbassan. Las pazientas ed ils pazients da Covid-19 en ils ospitals sajan cunzunt persunas betg vaccinadas. Las staziuns intensivas svizras sajan vinavant sut in ferm squitsch.
Nus stuain sa depurtar, sco sche nus avessan piglià il virus.
Plinavant ha Virginie Masserey fatg endament, che las mesiras enconuschentas sco mascrina, reglas d'igiena e limitar ils contacts, stoppian vegnir respectadas.
Unda dad omicron vegn
Las proximas emnas fin la fin dal schaner spetga Tanja Stadler il punct culminant dals cas da corona. Tenor la presidenta da la task force scientifica Covid-19 vegnian aifer in'emna 10 fin 30 pertschient da la populaziun a s'infectar cun il virus. E quai muntia er in augment dal dumber da pazients e pazientas en ils ospitals. Ils experts spetgan en il zenit da l'unda dad omicron tranter 80 e 300 persunas dapli sin las staziuns intensivas, tut tenor sch'il scenari è pli optimistic u damain.
Tanja Stadler ha vitiers tratg endament, che bleras infecziuns na pon betg vegnir chattadas, era pervi da las capacitads da testar. Per Virginie Masserey èsi impurtant da chattar il dretg equiliber, quai per pudair garantir ils servetschs ed ils transports.
En isolaziun van ins per ils auters
La media chantunala dal Grischun Marina Jamnicki ha menziunà, ch'i saja difficil da far cler ad intginas persunas, daco ch'ellas stoppian ir en isolaziun. Ed er patruns n'hajan magari nagina chapientscha, sche lavurantas u lavurants stoppian star a chasa senza sintoms.
Blera glieud tar occurrenzas
Las occurrenzas grondas hajan er da resguardar las reglas, sco 2G cun obligatori da mascrina u 2G+, ha Virginie Masserey respundì la dumonda d’in schurnalist. I saja chaussa dals chantuns da scumandar occurrenzas grondas.
Bler dependia dals concepts da protecziun ch’ils singuls organisaturs hajan elavurà, ha agiuntà Marina Jamnicki. Tenor las experientschas en il Grischun sajan dentant cunzunt festas privatas, sco anniversaris u nozzas, ils lieus nua ch’il coronavirus sa derasia fitg.
