Siglir tar il cuntegn

Header

audio
Omicron vegn ad infectar fitg la Svizra las proximas duas emnas, di il BAG
Or da Actualitad dals 11.01.2022.
abspielen. Laufzeit 3 minutas 15 Sekunden.
cuntegn

BAG ha infurmà a Berna Il temp da quarantina vegn probabel bainprest adattà

Problematic per la Svizra saja, che blera glieud na possia il mument betg ir a lavurar. Tgi saja en isolaziun, tgi en quarantina. Perquai duai il temp da quarantina sa reducir, ha ditg Virginie Masserey da l'Uffizi federal da sanadad BAG. I saja dentant la chaussa dal Cussegl federal da decider.

video
Masserey: «I ha num sa tegnair vid las mesiras»
Or da News-Clip dals 11.01.2022.
abspielen. Laufzeit 47 Sekunden.

Quai che pertutga il dumber da persunas che ston ir en ospitals, na pon ins tenor Virginie Masserey betg dir co la pandemia sa sviluppa, malgrà cifras che sbassan. Las pazientas ed ils pazients da Covid-19 en ils ospitals sajan cunzunt persunas betg vaccinadas. Las staziuns intensivas svizras sajan vinavant sut in ferm squitsch.

Nus stuain sa depurtar, sco sche nus avessan piglià il virus.
Autur: Virginie Masserey manadra secziun controlla d'infecziun BAG

Plinavant ha Virginie Masserey fatg endament, che las mesiras enconuschentas sco mascrina, reglas d'igiena e limitar ils contacts, stoppian vegnir respectadas.

Unda dad omicron vegn

Las proximas emnas fin la fin dal schaner spetga Tanja Stadler il punct culminant dals cas da corona. Tenor la presidenta da la task force scientifica Covid-19 vegnian aifer in'emna 10 fin 30 pertschient da la populaziun a s'infectar cun il virus. E quai muntia er in augment dal dumber da pazients e pazientas en ils ospitals. Ils experts spetgan en il zenit da l'unda dad omicron tranter 80 e 300 persunas dapli sin las staziuns intensivas, tut tenor sch'il scenari è pli optimistic u damain.

Tanja Stadler ha vitiers tratg endament, che bleras infecziuns na pon betg vegnir chattadas, era pervi da las capacitads da testar. Per Virginie Masserey èsi impurtant da chattar il dretg equiliber, quai per pudair garantir ils servetschs ed ils transports.

video
Stadler: «Bleras infecziuns na chattan ins gnanc»
Or da News-Clip dals 11.01.2022.
abspielen. Laufzeit 40 Sekunden.

En isolaziun van ins per ils auters

La media chantunala dal Grischun Marina Jamnicki ha menziunà, ch'i saja difficil da far cler ad intginas persunas, daco ch'ellas stoppian ir en isolaziun. Ed er patruns n'hajan magari nagina chapientscha, sche lavurantas u lavurants stoppian star a chasa senza sintoms.

Blera glieud tar occurrenzas

Las occurrenzas grondas hajan er da resguardar las reglas, sco 2G cun obligatori da mascrina u 2G+, ha Virginie Masserey respundì la dumonda d’in schurnalist. I saja chaussa dals chantuns da scumandar occurrenzas grondas.

video
Jamnicki: «I dependa dal dialog da tuts e tuttas»
Or da News-Clip dals 11.01.2022.
abspielen. Laufzeit 1 minuta 9 Sekunden.

Bler dependia dals concepts da protecziun ch’ils singuls organisaturs hajan elavurà, ha agiuntà Marina Jamnicki. Tenor las experientschas en il Grischun sajan dentant cunzunt festas privatas, sco anniversaris u nozzas, ils lieus nua ch’il coronavirus sa derasia fitg.

RTR novitads 15:00

Artitgels legids il pli savens

Scrollar a sanestra Scrollar a dretga