Siglir tar il cuntegn

Header

cuntegn

Banca naziunala svizra Perdita da 132 milliardas francs

La strategia da cumprar devisas en valutas estras ha chaschunà la pli gronda perdita dapi onns. Sco la Banca naziunala svizra communitgescha il glindesdi, munta quella a 132 milliardas francs. Quai influenzescha er il budget da la Confederaziun e dals Chantuns.

Normalmain quintan la Confederaziun ed ils chantuns cun quellas contribuziuns per lur budget, per exempel per amortisar custs extraordinaris sco che la pandemia ha chaschunà els. Quest onn eri dentant cler ch'ins na possia betg spetgar quai.

La perdita po la banca betg cumpensar cun reservas

Er sche la banca ha mess sin la vart daners per in tal cas: la perdita dal 2022 na po ella betg cumpensar dal tut. Suenter avair duvrà si las reservas, resta ina perdita da 39 milliardas, che sminuescha l'agen chapital.

Il davos quartal dal 2022 ha la Banca svizra perfin pudì sa revegnir in pau. Suenter perder 62 milliardas francs en il segund quartal, e 47 en il terz, hai dà en il davos in gudogn da 10 milliardas.

Reservas en valutas estras han perdì valur

Cunzunt las investiziuns en valutas estras han fatg che la Banca naziunala ha perdì uschè bler. La Banca naziunala ha pliras tschients milliardas reservas da devisas en valutas estras. Tar quellas tutgan aczias ed emprests. Quellas han chaschunà ina perdita da radund 131 milliardas francs.

La perdita è er ina consequenza da la strategia d'empruvar da tegnair bass la valuta dal franc svizzer. Per quai ha la Banca naziunala cumprà tschients milliardas devisas en valutas estras.

audio
Per tadlar: las novitads da las 12:00
ord RTR Audio dals 09.01.2023.
laschar ir. Durada: 6 minutas 23 Secundas.

RTR novitads 09:00

Artitgels legids il pli savens

Scrollar a sanestra Scrollar a dretga