Siglir tar il cuntegn

Header

cuntegn

Parlament naziunal Preventiv 2023 da la Confederaziun è approvà

Il parlament vul anc dar ora 14,5 milliuns francs dapli ch'il Cussegl federal. Tranter auter per protecziun da scossas.

Er cun augmentar las expensas sa tegn il parlament vid il frain da debits. I fiss anc stà pussaivel da pledar ulteriurs 180 milliuns francs per il 2023. En tut vul la Confederaziun dar ora 80,5 milliardas, e prender en 79,8 milliardas francs. Omaduas chombras han approvà quai.

Il parlament curregia la proposta dal Cussegl federal per il preventiv 2023 en ils puncts suandants:

  • Subvenziuns per la producziun da vin svizzer: 75,5 milliuns francs, 6,2 milliuns dapli ch'en la proposta.
  • Meglra protecziun cunter il luf: 4 milliuns francs dapli per protecziun da scossas (en tut 12 milliuns).
  • Mantegniment da razzas d'animals da niz indigenas: 3,9 milliuns francs dapli ch'en la proposta dal Cussegl federal (30 milliuns en tut).
  • 360'000 francs dapli per meglierar la situaziun d'etica en il sport (per finanziar in post d'annunzia per pertutgads e pertutgadas).
In dals politichers che pretenda da spargnar dapli: Ueli Maurer (PPS), partent minister da finanzas.
Legenda: In dals politichers che pretenda da spargnar dapli: Ueli Maurer (PPS), partent minister da finanzas. Keystone

Quant bler che la Confederaziun dat ora suenter 2023 pudess anc dar discussiuns. L'augment dal budget da militar e la sminuziun d'entradas tras l'economia pli flaivla vegn ad influenzar las pussaivladads. Tenor Ueli Maurer, minister da finanzas partent, smanatscha per 2026 gia in deficit da 7 milliardas francs. Cunzunt politichers burgais han admonì tar las debattas en las chombras da mirar dapli sin ils daners.

Credits supplementars per 2022 per fugitivs da l'Ucraina

Il Parlament ha era approvà ils credits supplementars per il 2022: per gronda part per sustegnair fugitivas e fugitivs da l'Ucraina (1,2 milliardas francs) e per cumprar l'ovra d'electricitad da reserva a Birr (radund 200 milliuns francs). Las cumissiuns da finanzas da las duas chombras han dentant cumplanschì ch'ellas veglian en il futur pudair sa participar dapli a la discussiun en cas dad expensas pli grondas.

audio
Per tadlar: las novitads da las 15:00
ord RTR Audio dals 08.12.2022.
laschar ir. Durada: 3 minutas 23 Secundas.

RTR novitads 12:00

Artitgels legids il pli savens

Scrollar a sanestra Scrollar a dretga