Siglir tar il cuntegn

Header

cuntegn

Banca naziunala svizra Perdita da passa 132 milliardas francs

La strategia da cumprar devisas en valutas estras ha chaschunà ina gronda perdita. Uss ha la la Banca naziunala svizra publitgà las cifras definitivas, cun ina perdita da record da 132,5 milliardas francs. Quai influenzescha er ils budgets da la Confederaziun e dals chantuns.

L'onn 2021 aveva la Banca naziunala svizra anc fatg in gudogn da 26,3 milliardas francs. Perquai avevan la Confederaziun ed ils chantuns survegnì ina summa da 6 milliardas francs per lur cassas. Quest pajament da la banca è quasi daventà in usit ils davos onns – ed è per exempel vegnì duvrà per amortisar custs extraordinaris sco che la pandemia ha chaschunà els. Quest onn eri dentant cler ch'ins na possia betg spetgar quai.

La perdita po la banca betg cumpensar cun reservas

Er sche la banca ha mess sin la vart daners per in tal cas: la perdita dal 2022 na po ella betg cumpensar dal tut. Suenter avair duvrà si las reservas, resta ina perdita da 39 milliardas, che sminuescha l'agen chapital.

Il davos quartal dal 2022 ha la Banca naziunala svizra perfin pudì sa revegnir in pau. Suenter perder 62 milliardas francs en il segund quartal, e 47 en il terz, hai dà en il davos in gudogn da 10 milliardas.

Reservas en valutas estras han perdì valur

Cunzunt las investiziuns en valutas estras han fatg che la Banca naziunala ha perdì uschè bler. La Banca naziunala ha pliras tschients milliardas reservas da devisas en valutas estras. Tar quellas tutgan aczias ed emprests. Quellas han chaschunà ina perdita da radund 131 milliardas francs.

La perdita è er ina consequenza da la strategia d'empruvar da tegnair bass la valuta dal franc svizzer. Per quai ha la Banca naziunala cumprà tschients milliardas devisas en valutas estras.

video
La Tagesschau da SRF il schaner davart las cifras provisoricas
Or da Tagesschau dals 09.01.2023.
laschar ir. Durada: 2 minutas 27 Secundas.

RTR novitads 09:00

Artitgels legids il pli savens