Siglir tar il cuntegn

Header

cuntegn

Barometer da quitads Custs da sanadad fatschentan 40% da la populaziun

Ils temas sanadad e cassas da malsauns fatschentan il pli fitg la populaziun svizra. Quai mussa il barometer da quitads, da la Credit Suisse. Cumpareglià cun l'onn passà è il quità per dumondas da sanadad e cassas da malsauns creschì per 16% sin nov 40%. La protecziun da l'ambient è vegnida remplazzada cun 38% sco il pli grond quità da l'onn precedent.

Sin plazza trais sa chatta il tema prevenziun da vegliadetgna/AVS cun 32%. Betg pli en ils top 10 dals quitads èn la guerra en l'Ucraina e la dischoccupaziun.

Bundant in quart da las persunas dumandadas ha inditgà las relaziuns cun l'Europa sco er dumondas d'energia. Ils dus quitads occupan tenor il studi las plazzas quatter e tschintg. Plinavant èn l'immigraziun (23%), l'inflaziun (22%), ils custs d'abitar/pretschs da locaziun (22%), ils fugitivs (20%) e la segirezza sociala (15%) en ils top ten dals quitads ils pli menziunads da las votantas e dals votants en Svizra.

Per il barometer da quitads a l'institut Gfs Berna dumandà l'avust ed il settember – passa 1'500 persunas cun il dretg da vuschar, da l'entira Svizra.

Differenzas tranter las generaziuns e la regiun linguistica

Il quità principal da differentas generaziuns sajan la sanadad e las chassas da malsauns, scriva la Credit Suisse ch'ha dà l'incumbensa per l'enquista.

La generaziun Z (18 fin 28 onns) è l'excepziun. Per ella è la protecziun da l'ambient e la stgaudada dal clima il pli grond quità. Er il quità da l'immigraziun sa reducescha cun la vegliadetgna da las persunas dumandadas.

Differenzas sa mussan er tranter las regiuns linguisticas. Il tema ambient/midada dal clima saja anc adina il pli grond quità en la Svizra franzosa e saja anc adina davant la sanadad/cassas da malsauns, ha la Credit Suisse communitgà. Er la guerra en l'Ucraina occupescha cun 22% cleramain dapli persunas en la Svizra francofona.

Ultra dals quitads da las cassas da malsauns domineschan en la Svizra tudestga ed en il Tessin cunzunt dumondas da la politica exteriura sco l'immigraziun, dumondas d'asil u las relaziuns cun la UE e l'Europa.

RTR novitads 09:00

Artitgels legids il pli savens