Bilantscha Covid-19 - Chantuns proponan correcturas per management da crisa
La crisa da corona è stada ina fida per ils chantuns – surtut per realisar las mesiras cunter il coronavirus. In rapport mussa uss co optimar la collavuraziun en situaziuns da crisa.
Il facit curt suenter dus onns pandemia: Las regenzas chantunalas vulan sa participar pli fitg a la discussiun. Per l'avegnir han ellas perquai preschentà 15 propostas da meglieraziun.
audio
Corona: Rapport collavoraziun chantuns e Confederaziun
03:39 min, ord Actualitad dals 06.05.2022.
laschar ir. Durada: 3 minutas 39 Secundas.
Curt e cnapp – las 15 mesiras
Avrir la boxSerrar la box
Precisar incumbensas e cumpetenzas, surtut tgi che decida cura mesiras.
Fixar princips tgi che paja tge, sche la Confederaziun decida mesiras.
Sclerir finamiras, criteris e finanziaziun per sustegns finanzials durant crisas (p.ex. cas da direzza, sustegn per firmas che ston serrar etc).
Confederaziun includa ad uras ils chantuns avant che decider mesiras ed optimescha il proceder da consultaziun.
Confederaziun integrescha era represchentants da citads e vischnancas avant decisiuns impurtantas.
Chantuns e Confederaziun analiseschan ed optimeschan lur standards e process giuridics.
La Confederaziun definescha posts da cussegliaziun per ils chantuns ed era ils chantuns fixeschan in contact per vischnancas e Confederaziun en situaziuns da crisa.
Represchentants dal Cussegl federal e da las regenzas chantunalas s'inscuntran regularmain per in barat strategic.
Ils chantuns garanteschan che las vischnancas èn involvidas gia da l'entschatta davent.
Las Conferenzas da directuras e directurs chantunals organiseschan il barat interchantunal ed installeschan in gremi da coordinaziun.
Ils chantuns optimeschan la coordinaziun regiunala.
Confederaziun e chantuns sa cunvegnan sin ina strategia communabla per la communicaziun.
La Confederaziun precisescha il mandat da la task force scientifica.
Avant che communitgar publicamain infurmescha la Confederaziun ils chantuns e viceversa.
En il plan da pandemia vegnan fixadas las schanzas dal sistem federalistic per la collavuraziun tranter Confederaziun, chantuns e vischnancas.
En general saja la collavuraziun tranter chantuns e Confederaziun stada buna durant la crisa, sa resultat dal rapport cumplessiv ch'ils chantuns han laschà far e ch'è vegnì preschentà oz a Turitg. Dentant mussian surtut la midada en la «situaziun extraordinaria» il zercladur 2020 e la preparaziun manglusa sin la segunda unda l'atun, ch'ins stoppia optimar ils process e la coordinaziun.
Legenda:
Trais cussegliers guvernativs preschentan il facit
Ernst Stocker (president directurs da finanzas), Christian Rathgeb (president regenzas) e Lukas Engelberger (president directurs da sanadad).
Keystone
En situaziuns da crisa pretendan ils chantuns perquai in stab federal permanent, che prepara las decisiuns dal Cussegl federal en coordinaziun cun represchentants dals chantuns. Potenzial dattia era tar la communicaziun: Intschertezzas e cuntradicziuns sminueschan la credibladad da las autoritads e fan pli grev da realisar las mesiras. Il rapport mussa plinavant ch'igl è inditgà da reveder la lescha d'epidemias sin basa da las experientschas fatgas ils ultims dus onns, tranter auter era cun la dumonda da finanzas: La Confederaziun surpiglia bain la gronda part da las consequenzas finanzialas, en l'avegnir duai dentant vegnir reglà tgi che paja tge gia cura che las mesiras vegnan decididas.
L'analisa
Avrir la boxSerrar la box
La Conferenza da las regenzas chantunalas (KdK) ha analisà il management da crisa cun agid d'ina retschertga online, discurs cun expertas, represchentants da chantuns e vischnancas. La radunanza plenara da la KdK ha approvà quest rapport ils 25 da mars.
