Per quai vai: Cun quest project vul il Cussegl federal stabilisar la via bilaterala cumprovada e far fit per l'avegnir, sco quai ch'el scriva en ina communicaziun. Il pachet saja en l'interess da la Svizra. El garantescha la cuntinuitad da las relaziuns economicas, scientificas e socialas cun l'Uniun europeica ch'è la partenaria commerziala la pli impurtanta da la Svizra. «En vista a la situaziun geopolitica precara èn relaziuns stabilas e fidadas cun ils stadis vischins europeics d'impurtanza strategica», hai num vinavant en la communicaziun.
L'argumentaziun: Las cunvegnas bilateralas I e II èn stadas il fundament da questa collavuraziun. Il terz pachet ch'è ussa avant maun sa colliescha e cumplettescha las cunvegnas existentas cunzunt en ils secturs da l'electricitad, da la sanadad e da la segirezza da victualias. Cun ina participaziun consolidada al martgà intern da l'UE stgaffescha la Svizra cundiziuns generalas fidadas per sia economia d'export e rinforza uschia sia bainstanza. Ultra da quai segirescha il pachet la participaziun a programs centrals da perscrutaziun sco «Horizon Europe» e rinforza uschia la Svizra sco lieu d'innovaziun. Senza stabilisar e sviluppar vinavant las cunvegnas existentas perdess la via bilaterala pass per pass sia substanza.
Adattaziuns pertutgant dretg da participaziun: Envers il project da consultaziun haja il Cussegl federal adattà trais ulteriuras leschas. Quellas pertutgan ils dretgs da cooperaziun dals chantuns, dal parlament e da la publicitad en il rom da l'uschenumnà «decisiun shaping», sco quai ch'igl ha gì num vinavant. Quai munta la cooperaziun da la Svizra a la procedura da legislaziun da l'UE en ils secturs, als quals la Svizra duai sa participar en il futur.
Trais leschas novas: Il parlament vegn a stuair s'occupar da trais leschas novas: per survegliar agids statals, per la collavuraziun administrativa tar la renconuschientscha da qualificaziuns professiunalas sco er per las contribuziuns da la Svizra per rinforzar la coesiun en l'Europa. Ultra da quai dumonda il Cussegl federal quatter credits d'impegn.
Adattaziuns a leschas existentas: 36 leschas federalas existentas stuessan vegnir adattadas vinavant, 15 da quellas en ina dimensiun «substanziala» e 21 en ina dimensiun »minimala». Entaifer il pachet sajan 94 acts giuridics da l'UE che han caracter da lescha relevants per la Svizra. Ils detagls davart quai declera la regenza al parlament en la missiva publitgada da 1'086 paginas.
4 conclus federals: Sco gia concludì il zercladur, reprenda il Cussegl federal il pachet da contracts e suttametta al parlament quatter conclus federals: in conclus per stabilisar las cunvegnas existentas sco er mintgamai in per las trais novas cunvegnas en ils secturs d'electricitad, da la sanadad e da la segirezza alimentara.
Referendum facultativ: Il Cussegl federal insista medemamain sin sia decisiun da suttametter ils contracts al referendum facultativ. Quai vul dir che tar in'eventuala votaziun dal pievel decida sulettamain la maioritad dal pievel e betg er la maioritad dals chantuns davart il resultat da la votaziun. A decider definitivamain en chaussa vegn medemamain il parlament.
