A Berna èn sa radunadas 2000 fin 4000 demonstrantas e demonstrants. Quai rapporta l'agentura da novitads Keystone/SDA. A Turitg sajan, tenor la Polizia da Tuitg, dapli che 10'000 persunas idas sin via per protestar cunter discriminaziun e cunter violenza da la polizia cunter persunas da pel stgira. A Son Gagl èn pli che 1'000 persunas idas sin via per demonstrar. Ulteriuras demonstraziuns hai dà a Lucerna ed a Losanna.
Polizia tolerescha demonstraziuns
Tenor las prescripziuns da la Confederaziun èn lubidas mo manifestaziuns fin e cun 300 persunas. Quai pervia dal coronavirus. A Turitg haja la polizia fatg attent a las demonstrantas e demonstrants sin quella regla. Pli tard haja la polizia communitgà, ch'els tolereschan la demonstraziuns, fertant ch'ella resta paschaivla.
Sco la Polizia da la citad da Turitg ha rapportà pli tard, saja vegnì bittà objets sin plirs policists. Sche quai èn stads demonstrants da la demo cunter rassissem na saja dentant betg cler, uschia l'agentura da novitads Keystone/SDA. Pliras persunas sajan vegnidas arrestadas.
Confruntaziuns a Londra
Demonstraziuns hai er dà en la Gronda Britannia. En il center da Londra hai dà confruntaziuns tranter la polizia e demonstrants. Sco la gasetta «Evening Standard» rapporta, èn pliras tschient persunas sa radunadas tar la statua da Winston Churchill, tranter quellas er dretg-extrems. Plirs hajan bittà crappa e buttiglias sin polizists. Il schef dal moviment dretg-extrem «Britain First» haja declerà, ch'ins veglia proteger la statua da Churchill da demonstraziuns anti-rassisticas.
Ord l'archiv:
Il «Minisguard» da l'emna passada ha tematisà il rassissem e daco ch'i dat pel mument quellas demonstraziuns.