In onn suenter la catastrofa da la natira en il Lötschental cursescha l'auto da posta vinavant mo fin a Wiler. La colliaziun a Blatten è interrutta dapi la bova. Ussa sa mussa co la regiun e la populaziun èn sa sviluppadas dapi lura.
Situaziun en la val
A Wiler sa preschenta il mintgadi per gronda part ordinà. Tenor indicaziuns dal turissem è la stagiun d'enviern stada cuntentaivla. La perdita d'alloschis a Blatten saja bain sa fatga da valair, tut en tut saja la dumonda dentant restada stabila.
La prontadad da discurrer publicamain davart ils eveniments dals 28 da matg 2025 è limitada. Las persunas dumandadas accentueschan ch'il focus saja sin il futur. La vischnanca da Blatten ha vinavant la finamira da stgaffir emprimas pussaivladads da returnar entaifer radund trais onns. Ina cumissiun coordinescha las lavurs.
Projects da construcziun ed infrastructura
La reconstrucziun è gia visibla en differents secturs. A Wiler e conturn marschan plirs projects da construcziun il medem mument. Latiers quinta tranter auter la construcziun d'ina nova via chantunala che duai en l'avegnir puspè pussibilitar ina colliaziun vers Blatten.
Per l'aclaun da Weissenried è planisada ina pendiculara per che las abitantas ed ils abitants possian returnar en in temp previsibel. En pli vegn actualmain construida a Wiler ina chasa da pliras famiglias cun 11 abitaziuns. Ella duai porscher a famiglias e pèrs da Blatten spazi d'abitar en la val.
In lavurer da construcziun descriva la situaziun sco extraordinaria, sa mussa dentant da buna speranza areguard il svilup a lunga vista.
Zona serrada e ristgs actuals
Ordaifer Wiler cumenza vinavant ina zona serrada. Da lieus elevads è visibla la dimensiun da las massas da crappa e terren da la bova. La situaziun para pli stabila che gist suenter la catastrofa. Tuttina existan vinavant ristgs: En il conturn dal Breitlauihorn sa distatgan tenor indicaziuns da las autoritads regularmain massas da glatsch e crappa d'in glatscher. La situaziun vegnia perquai survegliada cuntinuadamain.
En il mintgadi sa mussa tar bleras abitantas ed abitants ina clera tenuta: Dal passà na discurran ins betg gugent, quai che saja capità, saja capità. Ussa saja impurtant da guardar enavant.