Il Chantun Neuchâtel n'è betg cuntent cun las cundiziuns actualas dal center d'asil a Boudry, quai ha il chantun communitgà a scrit avant paucs dis al Cussegl federal. Las cundiziuns dal center d'asil stoppian sa meglierar – uschiglio na veglia il chantun eventualmain betg prolungar il contract dal center federal per requirents d’asil a Boudry. Er in’annullaziun dal contract – che cuzza enfin l'onn 2033 – saja pussaivla sch'i na vegnia midà nagut vi da la situaziun.
Il minister da giustia Beat Jans ha prendì posiziun tar questa annunzia dal chantun Neuchâtel envers Radio SRF. Els prendian serius ils quitads, di il minister, ma i na saja betg adina simpel da porscher ina schliaziun a curta vista che saja confurma al dretg. Actualmain discurria el cun tut ils chantuns. La finamira saja da discutar da nov las valurs centralas da la politica d'asil.
Chattar schliaziuns per la populaziun a Boudry
Il center d'asil a Boudry è – cun in spazi per 480 persunas – il pli grond center d’asil federal en la Svizra romanda. Ils ultims dus onns hajan gia 7'000 requirents d'asil chattà asil en il center a Boudry, quai di la cussegliera dal chantun da Neuchâtel, Florence Natter. Dapli persunas pia che la vischnanca da Boudry haja, cun ses 6'000 abitants.
La populaziun locala n'è insumma betg cuntenta cun la situaziun actuala. En plirs lieus (Steckborn, Chiasso e Boudry) haja adina puspè dà incidents difficils en connex cun il center d'asil – tranter auter mulestas sexualas, donns da material ed enguladitschs.
Quai n'è betg mo ina chaussa da Neuchâtel, quai è ina chaussa dal pajais.
L'uniun «Bien vivre à Neuchâtel» represchenta la populaziun e pretenda en ina petiziun ch'il center d'asil duaia porscher spazi sulettamain per dunnas e famiglias u ch'il center vegnia insumma serrà entaifer da sis mais. Florence Natter vul percunter ch'ils plaz d'asil vegnian reducids. Ella crai che l'acceptanza da la populaziun possia crescher uschia.
