Bova sur Blatten - President Bellwald: «Nus avain pers il vitg, però betg il cor»

• Mesemna a las 15:30 ha ina bova da grip, glatsch, sablun ed aua sutterrà grondas parts dal vitg da Blatten.
• Davos il material da serra sa furma in lac.
• Per lung dal flum Lonza èn parts dals vitgs vischins Wiler e Kippel vegnids evacuads mesemna saira tard.
• Ina gronda part dal glatscher è rutta giu ed ha sutterrà 90% dal vitg.
• Tut ils abitants èn vegnids evacuads. Ina persuna è sparida.

Sur Blatten en il Vallais è ina gronda part dal glatscher Birch rut giu en ina giada la mesemna. Quai il suentermezdi vi da las 15:30. La bova da glatsch, grip, sablun ed aua ha sutterrà quasi l'entir vitg evacuà da Blatten entadim il Lötschental. Igl ha dà gronds donns vi da bajetgs ed infrastructura, persunas na sajan però betg vegnidas a donn. Tuttina vala ina persuna anc adina sco sparida, ha il stab directiv confermà a la conferenza da medias a Blatten.

I saja stà il mender cas pussaivel tar questa bova. Tut il material saja vegnì a val ed haja stuppà il flum Lonza. Tenor il responsabel per privels da natira Raphaël Mayoraz na possian ins però betg esser segir che tut saja vegnì a val. Ins partia bain dal fatg ch'i saja uschia, però na saja quai betg segir.

Il lai da fermada Ferden possia bain anc prender si aua che la Lonza stuppada na po betg absorbar. Però restia il privel da bovas d'aua e lozza vinavant cun tanta aua sur ils vitgs. Mayoraz na sclauda era betg ch'i pudessia – tut tenor svilup da la situaziun – dar ulteriuras evacuaziuns en ulteriurs vitgs en la vallada. Pertutgads fissan surtut ils vitgs da Gampel-Bratsch e Steg-Hohtenn. Cun quels è il stab directiv en contact permanent. Ils ulteriurs vitg dal Lötschental sa chattian sur la Lonza e na sajan en quel senn betg periclitads.

Pleds emoziunals dal president communal

Il president communal da Blatten Matthias Bellwald ha appellà a la populaziun da Blatten da sa concentrar sin las lavurs ch'igl è anc da far. L'emprim sto la regiun ussa vegnir rumida da tut il material, nua ch'unitads da l'agid en cas da catastrofas èn er en acziun. Bellwald ha era exprimì in grond grazia a la Confederaziun e tut ils gidanters e las gidantras.

Entant resta la populaziun da Blatten bloccada en lur domicils provisorics. Tenor il stab directiv èsi ussa da sclerir intensiv ils basegns da la populaziun – e pir suenter sa fatschentar cun la situaziun dals domicils. Tant Confederaziun sco era chantun han sincerà da gidar. En in'emprima fasa cun superar la catastrofa – en ina segunda fasa cun sustegn social ed economic tar la reconstrucziun.

Vallais ha dumandà agid da l'armada – ed ella vegn

Entant ha il chantun Vallais dumandà agid da l'armada svizra. L'armada aveva gia tramess in detaschament per recognoscar la situaziun actuala e sustegnair la regenza vallesana ed il stab directiv tar l'examinaziun e las valitaziuns da la situaziun.

A la conferenza da medias ha il minister da defensiun svizzer Martin Pfister sincerà a tuts pertutgads e pertutgadas l'agid da l'armada. Ella saja sin via e vegnia a metter a disposiziun tut quai che la populaziun dovria. I sa tractia però d'in eveniment che vegnia a fatschentar tuts sur onns.

La Chadaina da Fortuna rimna daners

Avrir la box Serrar la box

La Chadaina da Fortuna rimna daners per ils pertutgads e las pertutgadas en il Lötschental.

Donar pon ins sin glückskette.ch u cun il code da QR.

Keller-Sutter: «Igl è terribel, sch'ins perda sia patria.»

Entant ha reagì era il Cussegl federal. La presidenta da la Confederaziun Karin Keller-Sutter mussa sia cumpassiun cun las abitantas ed ils abitants da Blatten ch'han pers lur patria.

Or da l'archiv: Il Minisguard declera la schelira permanenta