Sco quai ch'il servetsch scriva en ses rapport annual, sajan cunzunt Svizras e Svizzers che hajan cudeschà lur viadi sez en l'internet, stads confruntads cun problems. Savens haja dà reclamaziuns perquai che quels organisaturs da viadi hajan per part nagin u mo in pitschen servetsch da clients cun persunal pauc cumpetent. Quai saja lura stà in problem sch'ils clients levan midar il viadi u savevan insumma betg viagiar pervi da las restricziuns en connex cun il coronavirus. La restituziun da daners gia pajads è vegnida tratga a la lunga u è er vegnida refusada.
Il servetsch da mediaziun da la branscha da viadi spetga ch'intginas da las persunas che hajan gì problems, cudescheschian en l'avegnir puspè tar in biro da viadi svizzer. Là na dettia betg mo cussegliaziun. Arranschaments e viadis pauschals sajan en blers cas er segirads tras divers fonds da garanzia.
