Quai recumonda la cumissiun d'etica centrala da l'Academia svizra
da las scienzias medicinalas. Il «lockdown» pervia da la pandemia da corona vegnia ad engrevgiar la situaziun finanziala per blers en Svizra. Ord quest motiv vegnia il dumber da persunas che na possia betg pli pajar las premias anc a crescher. Glistas nairas e bloccadas da prestaziun na dastgian dentant betg esser la soluziun.
Talas glistas na sajan betg cumpatiblaa cun ils principis etics da tgira e giustia ed er legalmain betg valaivlas. Er na sajan ellas betg in instrument adattà per meglierar la morala da pajar u sco sistem da pre-avertiment social.
Differenzas tranter chantuns
Ils custs da sanadad vegnian adina pli fitg tar in problem en Svizra. Radund 6,4% da la populaziun en Svizra viva en ina chasada che ha almain ina giada betg pajà a temp las premias. Quai mussan las cifras da l'Uffizi federal da statistica per l'onn passà.
Sin la fin da l'onn 2019 avevan anc set chantuns glistas nairas: Argovia, Lucerna, Schaffusa, Son Gagl, Turgovia, Tessin e Zug. Ils ulteriurs chantuns n'han mai introducì glistas nairas u puspè abolì las glistas, sco per exempel il Grischun.
