Pierin Vincenz sto pajar ina multa da bunamain in milliun francs pervi d'omissiun fiscala. Il Tribunal federal ha refusà in recurs correspundent l'entschatta matg 2026 ed uschia confermà ina sentenzia da la Dretgira superiura Appenzell Dadora.
Concret vai per entradas betg decleradas en l'autezza da 3,4 milliuns francs ils onns 2012 fin 2015. Persuenter è vegnida pronunziada ina multa da 980'000 francs. Ultra da quai sto Vincenz surpigliar custs da dretgira da 12'500 francs.
La procedura da taglia n'è ditg betg stada enconuschenta publicamain, perquai che talas proceduras na vegnan da princip betg fatgas publicas en Svizra. Pir tras rapports en las medias è il cas vegnì public.
Novs documents en il process penal
Parallelamain marscha a Turitg vinavant ina procedura penala cunter Vincenz. En vista al process d'appellaziun l'avust 2026 ha la defensiun uss preschentà novs documents. Quai ha rapportà la «NZZ am Sonntag» ch’ha gì invista en quests documents.
Tenor rapports cumpiglian quels tranter auter chats, e-mails e sbozs da contracts. Els duain cumprovar ch'in pajament da 2,9 milliuns francs tras il partenari da fatschenta Beat Stocker è propi stà in emprest – e betg, sco supponì da l'accusaziun, in gudogn zuppà da fatschentas da participaziun.
La defensiun spera da quai ina nova valitaziun da las renfatschas centralas.
Grevas renfatschas restan
La procura publica renfatscha a Vincenz ed a ses partenari da fatschenta da blers onns tranter auter gestiun malfidaivla, cugliunaria, defraudaziun sco er sfalsificaziun da documents.
I va per il suspect che Vincenz saja s'enritgì persunalmain durant ses temp sco schef da la Raiffeisen tar cumpras e venditas da firmas.
Gia l'avrigl 2022 è el vegnì sentenzià da la dretgira districtuala da Turitg a bunamain quatter onns praschun. La sentenzia n'ha dentant anc betg vigur legala, perquai che la procedura d'appellaziun è anc pendenta.
Origin dal scandal
Lantschà l'affera han ins gia il 2016 cun retschertgas dal blog da finanzas Inside Paradeplatz. Lura era vegnì enconuschent che Vincenz aveva survegnì il 2015 in pajament da passa 2,9 milliuns francs. Gia baud è vegnì supponì in pussaivel connex cun la surpigliada da la firma Investnet tras la Raiffeisen.
Questas scuvertas han manà ad inquisiziuns internas tar la banca e la finala a l'intervenziun da la surveglianza dal martgà da finanzas Finma.
Decisiun spetgada la stad
La proxima etappa decisiva en il cas spetga l'avust 2026: lura vegn la Dretgira superiura da Turitg a giuditgar en la procedura d'appellaziun davart las renfatschas penalas cunter Vincenz.