Siglir tar il cuntegn

Header

cuntegn

«Cell broadcast» Amherd vul sistem d'avertiment per telefonin

La ministra da defensiun Viola Amherd vul serrar ina largia en il sistem d'avertiment da la Svizra. Cun ina novitad sin il telefonin, sch'i smanatscha privel.

Puspè vegnì en discussiun è quest sistem suenter las inundaziuns da la stad. En Germania èn mortas 180 persunas perquai ch'ellas n'èn betg vegnidas avertidas ad uras da las massas d'aua. Er en Svizra haja il sistem d'avertir mancanzas. Quellas vulan ins uschia serrar.

L’uschenumnà «Cell broadcast» trametta curts messadis da 3 lingias a tut ils telefonins d'ina regiun. Quest sistem na duai betg remplazzar ils sistems d’alarm existents sco sirenas, radio, televisiun u l’app «Alertswiss», mabain cumplettar quels. Sco la pledadra da l’Uffizi federal per la protecziun da la populaziun ha ditg, saja quel gia vidlonder d’examinar l’introducziun dal nov sistem.

Dovra basa legala

La Frantscha e l'Italia enconuschan gia «Cell broadcast» En Germania e l'Austria duai il sistem vegnir introducì proxim onn. Betg dal tut uschè svelt vegni probablamain ad ir en Svizra. Il departament dad Amherd parta dal fatg ch'i dovria sco emprim ina basa legala per pudair realisar la mesira.

Sche quai funcziuna, dovri anc dus pass tecnics: I dovra ina colliaziun tar ils gestiunaris da las raits mobilas. Plinavant ston quels activar il «Cell broadcast» en lur raits. Il dischavantatg dal sistem è ch'ins na po betg trametter purtrets u graficas, mabain be texts curts.

Ord l'archiv:

audio
Digitip – «Alertswiss» per cas urgents
aus Tips, trics e tacs vom 29.10.2018.
abspielen. Laufzeit 3 minutas 19 Sekunden.

RTR novitads 08:00

Artitgels legids il pli savens

Scrollar a sanestra Scrollar a dretga