La pastoraziun muslima en ils centers federals d'asil cuntinuescha definitivamain. Quai ha decis il Secretariat da stadi per la migraziun. Dapi dus onns datti quest project cun persunal da pastoraziun muslima. La raschun ch'ins ha cumenzà cun quai èn stads ils conflicts en plirs centers d'asil. La preschientscha dals spirituals vegnia appreziada dals migrants sco era dal persunal.
En las quatter regiuns d’asil Turitg, Svizra romanda, Svizra Orientala sco era la Svizra Centrala ed il Tessin lavuran totalmain sis spirituals. Tranter els er ina dunna, sco il secretariat ha communitgà. Sper quella purschida èn era spirituals cristians activs en ils centers d’asil.
Segirar il futur
Per segirar la finanziaziun a lunga vista vul il Secretariat da stadi per la migraziun precisar la situaziun giuridica. Or da quai motiv è il project vegnì integrà tar la revisiun da la lescha d’asil. Quella è en consultaziun dapi ils 25 da schaner.
Il project da pilot haja purtà resultads fitg positivs e la pastoraziun muslima saja ina resursa fitg custaivla per ils centers d’asil. Ils requirents e las requirentas d’asil fan gugent diever da quest servetsch.
En ils centers d’asil da la Confederaziun è il dumber d’agressiuns, smanatschas, mulestas ed auters eveniments ì enavos il davos onn. Il Secretariat da stadi per la migraziun maina enavos in ton da quest svilup sin la purschida da prevenziun sco la pastoraziun muslima e la prevenziun da conflicts.
