Anc nagut cun ina renconuschientscha dal certificat da Covid svizzer en l'Uniun europeica. La Cumissiuns da l'UE cuntradi a la Confederaziun ed ha communitgà ch'i na dettia anc betg ina renconuschientscha definitiva per il certificat da Covid che la Svizra dat ora per persunas vaccinadas, guaridas u testadas. La Svizra haja sulettamain survegnì la conferma pertutgant ils tests tecnics. Quels funcziunian, ha scrit la Cumissiun da l'UE sin dumonda.
Pli bler na saja il mument anc betg pussaivel. La basa legala per quai na saja numnadamain anc betg entrada en vigur, hai gì num vinavant. La Svizra stoppia ultra da quai l'emprim anc confermar la reciprocadad. E lura dovria anc la decisiun definitiva da la Cumissiun da l'UE.
Il venderdi suentermezdi aveva il vicedirectur da l'Uffizi federal per informatica Philippe Voirol ditg avant las medias che la Svizra haja survegnì la conferma uffiziala da l'UE. Entant ha er l'uffizi federal relativà las constataziuns da Voirol.
