Pierre Maudet, il cusseglier da stadi dal chantun Genevra, accepta sia exclusiun da la partida chantunala da la PLD. El na vegnia betg a far recurs cunter la decisiun da la suprastanza chantunala da l'entschatta fanadur. Quai ha ditg Maudet en in'intervista cun la gasetta gratuita emnila da la svizra franzosa GHI.
Maudet vegn perquai a far part da la regenza dal chantun Genevra senza sustegn da partida. El saja vegnì elegì dal pievel avant dus onns e veglia restar en uffizi sco commember independent da la regenza chantunala genevrina, ha declerà Maudet.
L'affera Maudet fatschenta la politica da Genevra dapi dus onns. Cunter el è vegnì investigà, perquai ch'el duai avair prendì encunter sco commember da la regenza differents regals – tranter auter in viadi da luxus ad Abu Dhabi. La procura publica ha annunzià il mais passà da vulair metter Maudet davant dretgira.
