Martin Ackermann, il president da la taskforce da corona: «La taskforce è vegnida a la conclusiun che las mesiras decidas il venderdi passà, na tanschan betg. Ord vista scientifica duessi dar uschè svelt sco pussaivel novas mesiras – sumegliantas sco la primavaira. Stizuns e butias betg essenzialas duessan vegnir serradas.»
Els na vesian nagins indizis per ina meglieraziun da la situaziun ed i saja d'agir immediat. Adina dapli operaziuns e tractaments stoppian vegnir spustadas, uschia pateschian pia era persunas che n'hajan betg Covid-19.
Plinavant saja la tskforce pertscherta ch'i dettia glieud che haja gia stuì resguardar mesiras rigurusas. Ma, er en la Svizra dal vest, saja la cifra da reproducziun puspè s'augmentada quasi sin 1. Il svilup mussia dapertut be en ina direcziun e quai saja ensi.
Ackermann di, ch'i stoppia vegnir agì urgentamain per puspè pudair viver en in temp adequat a moda e maniera betg uschè dirigida da la pandemia. Mintga di quintia.
Infecziuns sur tut sur amis e la famiglia
Rudolf Hauri, il medi chantunal da Zug ha discurrì durant la conferenza da pressa davart ils lieus nua ch'i vegnia s'infectà il pli savens. Las infecziuns possian vegnir manadas enavos sur tut sin inscunters cun amis ed amias e la famiglia. Ma, er tar il mangiar saja là il privel. Uschia per exempel en stanzas da pausa u sch'i vegnia discurrì dad aut, là saja il risico da s'infectar pli aut.
Cifras actualas:
En l'entira Svizra hai dà 4'271 novas infecziuns dapi ier – 217 da quellas en il Grischun. En quest dumber èn però integrads ils 150 tests da massa positivs da la fin d'emna en l'Engiadina ed il Grischun dal sid. Dals 16 letgs d'intensiva en l'ospital chantunal èn il mument 13 occupads, a Samedan 3 da 6 letgs, da quai 8 cun pazients da Covid-19. En l'entira Svizra è l'occupaziun il mument tar 78%. Sco il chantun Grischun, ma er Ackermann han infurmà na saja il problem betg l'infrastructura, mabain ch'i dovria per mintga staziun intensiva er il persunal necessari.
Sco quai che la taskforce da la Confederaziun ha orientà, cumenzian ils cas a crescher sin in nivel bler memia aut. I dettia indizis che las finamiras dal Cussegl federal, na vegnian betg cuntanschidas, perquai dovria ulteriuras finamiras.
