En l'entira Svizra èn durant ils emprims trais quartals dal 2021 vegnids registrads stgars 2'900 cas d'urgenza en las muntognas. Quai èn var 400 dapli che durant il medem temp da l'onn avant e bunamain tants sco durant l'entir 2019. Quai mussan las novas cifras dal Club alpin svizzer.
Nudà damain cas d'urgenza han ins tar ils sports da naiv. Er sche las cundiziuns da naiv sajan stadas bunas la primavaira per far turas da skis, sajan blers sco i para suandà las recumandaziuns da las autoritads ed hajan desistì dad ir en tura.
Dapli cas suenter lockdown
Dapli cas da salvament hai percunter duvrà per sportits da viandar, da rampignar ed ir cun mountainbike. Quellas cifras reflecteschan che la glieud è suenter il lockdown puspè vegnida pli activa ed ida en muntogna.
Il dumber da mortoris è durant ils emprims nov mais da l'onn restà sin il nivel da l'onn avant. Ils emprims nov mais èn 136 persunas mortas en las muntognas svizras, duas dapli che durant il medem temp dal 2019.
Dapli Svizzers pertutgads
Sco spetgà è la cumpart dad alpinistas ed alpinists svizzers stada pli gronda ch'ils onns avant. Il 2019 haja la cumpart da Svizzers anc muntà a 63%, durant l'onn current saja la cumpart d'indigens s'augmentada sin 73%.
Ord l'archiv:
Ils mars han las chamonas da CAS anc fatg prognosas nairas pervi da las malsegirezzas dal coronavirus. I n'era betg segir sche las reservaziuns valian u betg.
