Siglir tar il cuntegn

Header

cuntegn

Co vinavant? A curta vista mesiras pli rigurusas – silsuenter schluccadas

Ina maiortad da la populaziun sustegn anc adina l'agir dal Cussegl federal – i dat dentant adina dapli vuschs che pretendan da schluccar las mesiras. Questa midada d'atmosfera constatescha l'institut da perscrutaziun Sotomo che ha fatg ina retschertga per incumbensa da la SRG SSR.

Tar trais da total tschintg dumondas constatescha l'institut Sotomo ina midada d'opiniun. Surtut la decisiun da serrar fatschentas e butias va per adina dapli persunas memia lunsch, numnadamain per 22%. Tuttina èsi da dir che la gronda maiortad (62%) è da l'avis che questa decisiun dal Cussegl federal saja stada adequata.

Grafica davart l'acceptanza da las mesiras
Legenda: Co valetais Vus las differentas mesiras ch'il Cussegl federal ha decis? RTR Grafica

Mesiras pli rigurusas sur Pasca

Dovri mesiras pli rigurusas sur ils dis da Pasca? Questa dumonda respundan 61% da las Svizras e dals Svizzers cun GEA. Qua sa mussan dentant grondas differenzas tranter las regiuns: Il pli ferm para il giavisch per ulteriuras mesiras dad esser en la Svizra taliana (85%), suandà da la Svizra franzosa (70%) e la Svizra tudestga (56%). Il Cussegl federal n'ha enfin ussa anc betg decis da relaschar mesiras pli rigurusas sur ils dis da Pasca – mesemna tegn el sia proxima sesida.

Grafica davart mesiras giavischadas sur Pasca
Legenda: Vulais Vus sur Pasca mesiras pli rigurusas che restrenschan la libertad da sa mover? RTR Grafica
audio
Ina part vul mesiras pli rigurusas
ord Actualitad dals 08.04.2020.
laschar ir. Durada: 1 minuta 8 Secundas.

Tge capita suenter ils 19 d'avrigl?

La «situaziun extraordinaria» ch'il Cussegl federal ha decis vala enfin ils 19 d'avrigl 2020. E lura? 42% da las persunas dumandadas respundan cun: Schluccar las mesiras. 37% vulan mantegnair las mesiras actualas e be 13% pretendan mesiras pli rigurusas. Ils perscrutaders da Sotomo interpreteschan quest resultat uschia: I na dat anc nagina maioritad clera che vul schluccar las mesiras actualas – las proximas emnas po quai dentant anc sa midar.

Grafica davart co agir suenter ils 19 d'avrigl
Legenda: Co duai ir vinavant cura che las mesiras che restrenschan la vita e l'economia na valan betg pli ils 19 d'avrigl? RTR Grafica

Cler è dentant tge mesiras che la Svizra vuless schluccar – sch'i vegniss uschè lunsch: Avrir puspè las butias (51%), avrir puspè las scolas (39%). Pli pauca prioritad ha tenor la retschertga la reavertura da parcs publics ubain lubir occurenzas cun blera glieud.

Nagina tema pli per ils ospitals

Marcanta è la midada d'opiniun tar la dumonda sch'igl è da temair en ils ospitals svizzers ina situaziun sumeglianta sco en la Lombardia. Tar l'emprima retschertga da Sotomo (ils 22 da mars) eran anc trais quarts da las persunas dumandadas da quest avis, actualmain èn quai be anc 30%. Quai mussa ch'il svilup dal coronavirus en l'Italia ha influenzà fitg la percepziun en Svizra. I mussa dentant era che la maioritad ha actualmain betg tema ch'ils ospitals sajan surchargiads durant la crisa.

Grafica davart ils ospitals
Legenda: Temais Vus ch'ils ospitals svizzers èn bainspert era uschè surchargiads sco ils ospitals en la Lombardia? RTR Grafica

La retschertga

Avrir la box Serrar la box

Era questa segunda retschertga naziunala ha l'institut da perscrutaziun Sotomo fatg sin incumbensa da la SRG SSR. En tut han 29‘891 persunas respundì las dumondas publitgadas online tar RTR, SRF, RSI, RTS e Swissinfo. La retschertga è vegnida fatga sur la fin d'emna dals 3 fin ils 6 d'avrigl 2020. La quota da sbagls munta a +/- 1,2 puncts procentuals.

Dapli detagls da l'emprima retschertga da Sotomo chattais qua:

RTR novitads 17:00

Artitgels legids il pli savens