Siglir tar il cuntegn

Header

Ina vendidra ed in satg dal Migros.
Legenda: La pandemia da corona ha purtà gudogns, ha dentant era custa bler il Migros. Keystone
cuntegn

Commerzi en detagl Migros fa in gudogn da record

Il detaglist svizzer Migros noda per l’onn passà in gudogn net da 1,76 milliardas francs. Quai è passa il dubel dal gudogn da record d’enfin uss – ch’era stà il 2014 tar 826 milliuns francs.

Effectuà quest gudogn istoric dal Migros ha tranter auter la vendita dal Globus, cun grondas immobiglias. Era il 2020 ha il Migros vendì il center Glatt datiers da Turitg. Questas duas transacziuns han procurà per in gudogn spezial da 1,25 milliardas francs, sco il schef da finanzas dal Migros Jörg Zulauf ha ditg en la conferenza da medias virtuala davart la bilantscha.

Senza questas venditas avess i Migros fatg il 2020 in gudogn net da 555 milliuns francs. Quai è cumparegliabel cun il grond concurrent Coop, che ha fadia 539 milliuns francs.

Pandemia procura per plus e minus

La pandemia da corona ha influenzà considerablamain las fatschentas dal Migros. En las butias èn las cumpras s'augmentadas fitg, il turissem da cumpra è crudà ora, ed online ha la glieud empustà sco anc mai.

Da l'autra vart han secturs da las fatschentas dal Migros era patì, tranter auter la gastronomia ed ils centers da fitness. Fitg nausch saja stà per Hotelplan, pervi da las restricziuns da viagiar, hai gì num tar il Migros.

RTR novitads 12:00

Artitgels legids il pli savens

Scrollar a sanestra Scrollar a dretga