In sguard en il passà mussa il svilup: En la staziun da Basilea ha la viafier federala ina giada testà in automat da bigliets sco quai ch'i na deva lura anc nagliur sin il mund. Ins tscherniva la destinaziun, il pretsch da viadi vegniva inditgà – ed il quint è sa reducì sin nulla cun bittar en munaida.
60 onns pli tard vesa la realitad ora auter. Automats n'acceptan betg pli daners bluts u svaneschan dal tut, quatter da tschintg bigliets vegnan cumprads ozendi digitalmain. Per ils blers viagiaturs e viagiaturas è quai cumadaivel. Ma gist persunas pli veglias senza smartphone sa sentan pli e pli exclusas. Sco quai che la «NZZ» rapporta, s'accumuleschian perquai tar l'Uffizi federal da traffic las reclamaziuns.
Confederaziun pretenda alternativas analogas
L'Uffizi federal da traffic reagescha cun cleras directivas: En in scriver a la branscha da traffic public pretenda l'autoritad ch'ins stoppia vinavant garantir la cumpra analoga ed anonima da bigliets. Concret hai num en il scriver: «L'Uffizi federal da traffic spetga che tut las interpresas da transport procurian ch'i dettia pussaivladads da cumprar in bigliet valaivel per persunas che na vulan u na pon betg retrair il bigliet sin via digitala.»
Andreas Windlinger, pledader da l'Uffizi federal da traffic, argumentescha: «Questas persunas na duain betg vegnir surpassadas. Era els tutgian tar la clientella impurtanta dal traffic public, er sch'i sa tracta d'ina minoritad.»
Branscha renviescha ad alternativas existentas
La branscha da traffic public defenda ses curs da digitalisaziun, sa mussa dentant pronta da realisar las prescripziuns federalas. L'organisaziun da branscha Alliance SwissPass fa attent ch'i dettia gia oz alternativas per persunas senza smartphone.
Il mainafatschenta Helmut Eichorn numna exempels concrets: «Nus purschain en tschertas regiuns la pussaivladad da chargiar per telefon il bigliet sin in SwissPass.» In'autra opziun saja la carta da prepaid lantschada l'atun passà. Era quella porschia ina soluziun fisica per pudair utilisar il traffic public.
Las prescripziuns da la Confederaziun èn liantas. D'accord èn omaduas varts: La digitalisaziun duai cuntinuar – per passagiers senza smartphone duai dentant dar alternativas.