Anteriurs uffants plazzads e persunas internadas administrativamain duain pudair dumandar las contribuziuns da solidaritad era sur il termin fixà fin uss. Il Cussegl dals chantuns va d'accord da midar la lescha talmain. Era gia s'exprimida per in gea è la cumissiun giuridica dal Cussegl naziunal. Il Cussegl naziunal ha anc da decider en chaussa.
Il termin curt per la contribuziun da solidaritad aveva pussibilità da pajar ora spert ils daners. Dentant avevan radund 250 unfrendas da mesiras sfurzadas betg pudì inoltrar lur dumonda aifer il termin. Perquai aveva l'anteriur cusseglier dals chantuns Raphaël Comte (PLD/NE) intimà la midada da lescha cun ina iniziativa parlamentara.
Contribuziun da solidaritad è in gest
Nov duai er l'autezza da la contribuziun da solidaritad da 25'000 betg valair sco summa maximala, mabain sco summa fixa. Questa midada ha il Cussegl federal dumandà. La contribuziun da solidaritad saja in gest da la Confederaziun. I na fiss betg gist sche unfrendas che han inoltrà lur dumonda memia tard, survegnissan pli pauc, ha argumentà la cussegliera federala Karin Keller-Sutter.
Fin tar il termin eran vegnids inoltradas 9'000 dumondas dad unfrendas. Tenor Karin Keller-Sutter saja la contribuziun da solidaritad fin uss vegnida pajada ora en 8'800 cas. Tenor ils resultats da perscrutaziun èn durant il 20avel tschientaner almain 60'000 persunas stadas pertutgadas da mesiras repressivas.
RTR novitads 12:00
