Per coordinar las mesiras cunter la stgaudada globala han ils pajais dal mund sa radunà a Sharm el-Sheik. Là duai durant duas emnas vegnì chattà schliaziuns e plans da reducziuns liants. I va era per blers daners.
Simonetta Sommaruga è partida mardi vers l'Egipta per represchentar la Svizra. Ses negoziader Franz Perrez tema entant ch'i dettia la fin ina cunvegna senza muntada pratica. Uschia è la situaziun da partenza da Sommaruga difficila. La Svizra è in dals pajais che pretenda pli fermas mesiras cunter la stgaudada.
Bilantscha suenter in'emna conferenza
Il glindesdi ha il president da la conferenza da clima avertì ch'i saja anc bler da cuntanscher. «L'emprima emna duess ins rugalar dumondas tecnicas davart las tractativas», ha Franz Perrez ditg. Quai duai capitar avant che las dumondas politicas vegnan sin maisa, pia tgi che reducescha quant bler emissiuns e paja quant blers daners.
Tar la segunda emna da la conferenza saja d'ademplir bler. Massa temas na sajan anc betg vegnids discutads. I dettia ina retscha da temas en il mument. En quella situaziun arriva la cussegliera federala Simonetta Sommaruga.
Senza ina cunvegna cun resoluziuns concretas na vegnian ins betg da restrenscher la stgaudada globala sin 1,5 grads, ha Franz Perrez ditg vinavant. Quai pudess dentant esser decisiv per evitar reacziuns da chadaina.
